【志雲難局之疑團未解】無綫總經理陳志雲涉嫌貪污，上周四被廉署拘捕並於翌日獲釋。昨日他終於打破緘默在尖沙嘴舉行萬眾矚目記者會，其姿整妝容、自信微笑、精采演辭以至韋家晴上身的抑揚頓挫DJ腔，以及金句「真的假不了，假的真不了」，俱成全城熱話。志雲愛將鄧健泓及唐詩詠異口同聲稱讚陳總表現EQ高，雪中送炭為首領加油；反雲勢力則句句頂心杉，高志森和白韻琴齊聲揶揄陳總真假論等同講「阿媽係女人」，完全廢噏；詹瑞文則嘲他藉娛樂性講辭洩憤，袁彌明更踩志雲小器無聊，高調亮相如開騷。
採訪：葉雪、羅慧敏
攝影：陳順禎、卓寶花、林德雄
反勢力
高志森揶揄講廢話
「聽完佢話『真的假不了，假的真不了』嘅感覺好簡單，就即係好似話畀你聽『我阿媽係女人，我阿爸係男人』一樣，要點解釋你自己諗啦。」
白韻琴狂轟博曝光
「睇完陳志雲嘅記者會，我覺得佢戲好過做飯局，尾段佢仲講真的假不了，假的真不了，呢句明係話阿媽係女人，佢應該講畀自己聽。調查期間佢高調開記者會，仲笑到蓮子蓉咁嘅面口，完全毫無誠意，冇人有興趣聽佢出嚟解畫，咁樣都想博曝光，真係好瘋狂。佢呢幾年做晒嘟嘟（鄭裕玲）同肥肥（沈殿霞）嘅嘢，呢件事（指涉貪被捕）唯一值得慶幸係TVB唔使再變志雲電視台。」
詹瑞文暗寸識做騷
「陳生真係好了得，睇得出佢今日見記者，係好想搵個出口去表達自己呢個時段嘅壓力，雖然當中好多憤怒，但佢用咗輕描淡寫嘅方法表達出嚟，現場由解畫戴口罩由廉署出嚟到去買碌柚葉買一送一，全部都好幽默，係佢一貫風格。陳生搵咗一個好好方法去滿足大家，用充滿娛樂性出嚟講嘢，但相信觀眾最想知真相出現時，陳生會點去respond（作答）。」
陳鍵鋒明嘲搞黨派
「一貫陳生作風咁大方同EQ高，我一向都冇陳生電話，其實一直都只係外界講我係佢愛將，不過我都借機會向陳生同其他幾位同事問候一聲。我一直冇諗過自己係乜黨派，返工放工又唔去乜嘢活動，所以咪搞成咁。公司先係我老闆，冇話邊個係我上司。思潮間公司冇搵過我做嘢，但陳生秘書曾經問過我經理人要唔要訂《志雲飯局》嘅舞台版飛。」
袁彌明譏諷小心眼
「由佢講嘢睇得出佢份人好小器，佢逐一反擊傳媒報道，真係好無聊。佢話呢幾日自己唔係冇出街，主要想話畀人聽佢唔係眾叛親離，佢份人好小心眼。」
撐勢力
鄧健泓：佢EQ好高
「我好欣賞佢嘅係佢不嬲EQ好高，仲有處事能力同應對，好有幽默感，我覺得佢係一個好叻嘅人，單憑你哋就咁講佢喺記者會嘅內容都覺得佢好出色。今日新聞報道會碌住播，我都會睇番。如果嚟緊啱時間嘅話，亦會去探佢。」
張繼聰：佢真係好叻
「陳志雲講嘅『真的假不了、假的真不了』，我覺得好有意思，喺呢個階段自己唔方便講嘢，不過我覺得佢精神唔錯，作為朋友都安心啲。我覺得佢一路以嚟EQ都好高，面對壓力唔容易，佢真係好叻。我暫時唔打攪佢，佢好需要休息。」
唐詩詠：為傳媒現身
「我有send鼓勵嘅說話畀陳生。我認識嘅佢係好樂觀、積極、EQ又高，心地好好嘅人，我相信佢今次出嚟係為咗傳媒。」
李詩韻：跟佢學口才
「陳生一向好叻，口才好好，又有急才，腦筋靈活轉數快，每次行出嚟講嘢都好淡定，我以前都同佢講過好想跟佢學口才。」
一網講盡
梁思浩玩金句：衰的好不了
陳志雲昨日高調舉行記者會，並在會上強調「真的假不了、假的真不了」，擺明意有所指，網民隨即將這金句大玩特玩，網友向伯母說不便拿陳志雲的性取向來開玩笑：「基的直不了，直的基不了。」網民BoogieMan則揶揄他涉嫌貪污：「貪的少不了，少的貪不了。」另一方面，曾與無綫鬧翻的梁思浩（圖），昨日即時在facebook留言說：「衰的好不了，好的衰不了！！！人在做，天在看！！！大師回頭是岸吧！」
