新科（Shinco）助理總經理Sam哥昨日約咗小妹喺觀塘食晏，話有新嘢介紹畀我，食食吓，佢攞咗部4.3吋輕觸式屏幕PMP出嚟。哦，又係呢啲嘢。Sam笑笑話，呢部機確實係可以播到電影、音樂、照片，做埋電子書都得。但佢嘅真身，係Shinco最新嘅便攜式GPS衞星導航器E207。
包括中港澳地圖售$1890
Sam話呢部GPS內置中港澳嘅全新地圖，網羅2,800縣市，只要揀選咗「起點」同「目的地」，揸住部車穿州過省揸到北京都唔會迷路，「啱晒一啲有大陸車牌嘅車主，趁復活節買嚟返大陸自駕遊。」潮流興3D，Sam話地圖用3D設計，路口紅綠燈都標埋出嚟，香港地圖仲係全港首創有埋英文。
Sam強調部機最特別功能係全港獨家嘅電子警察提示，當部車駛近俗稱「白鴿籠」（拍攝快車位）300米位置，部機就會狂閃燈，提醒小心被影快相；司機一旦超速，部機又會出聲提示。設定咗行車目的地，部機又會提供推薦路線、距離最短等四條線選擇。
飯都未食完，Sam哥就揸車示範畀小妹睇，目的地set喺荒蕪嘅將軍澳工業邨蘋果大樓，屏幕顯示車程約20分鐘。當部車行到接近將軍澳隧道收費亭，部機突然響晒閃燈警號，真人發聲話隧道入邊會影快相。部車過完隧道行快咗，部機又提醒超速。Sam笑笑口話，呢部GPS賣$1,890，功能多多，都算抵用啦！
電郵：mailto:[email protected]