【志雲難局之義無反顧】鄭伊健早年拍攝《古惑仔》系列電影，飾演義字行頭的黑幫大佬陳浩南。昨日他在旺角出席護膚品宣傳活動時，被問到出道不久已認識的好友錢國偉牽涉入貪污案，他即力撐老友，指二人日日都見面，並投以信任一票。
鄭伊健擔任護膚品宣傳大使，昨日在旺角出席活動。無綫監製錢國偉捲入貪污案，二人相識很久，作為其好友的伊健力撐好友，他承認與錢國偉有聯絡，伊健說：「有聯絡，咁我哋係朋友嘛！以前喺無綫做兒童節目已經識。佢家好得閒，都有關心吓佢。」
案件在調查中，問到有沒有探望錢國偉，伊健說：「日日都見，得閒吖嘛！其實都係聯絡吓啫。」他並表示不擔心好友，至於錢國偉可會擔心，伊健說：「又唔係好覺，好多嘢仲未知發生乜嘢事，都係協助調查，佢有好多朋友支持。作為佢朋友，一定支持佢。
建議好友放假
是否與錢國偉打遊戲機作安慰，伊健說：「冇乜，反而覺得佢可以考慮呢個時候放吓假，因為佢好耐冇放過。」被問到錢國偉需放假多久，伊健說：「要等TVB安排。」伊健又稱二人相識以來，錢國偉並沒有為他安排工作，也未試過與叢培崑的製作公司合作。至於陳志雲昨午舉行記者會，伊健聽到內容後說：「我都係關心我朋友多啲，我都識佢（陳志雲），但唔方便講太多。」
唔知阿Sa甩拖
此外，鄭中基與蔡卓妍（阿Sa）高調宣佈分手，伊健與阿Sa曾傳緋聞，他說：「我算係哎吔阿哥，係睇報道先知。」戲劇性地當有報道指二人已婚，二人卻即時宣稱已和平分手，伊健說：「傳啫！娛樂新聞一則。」
採訪、攝影：王連連
小八卦：翻版偉仔執靚志雲
陳志雲昨日現身記者會時容光煥發，全賴有忠實化妝師Gary（左）及吸煙型男髮型師（右）在背後為他執正。現時仍在TVB工作的化妝師Gary，有「翻版梁朝偉」之稱，在圈中也頗具聲名，他更是陳志雲的御用化妝師，不時為他執靚樣錄影節目《志雲飯局》及出席活動。
疑似陳詩慧上門
記者昨日依然在陳志雲位於何文田的住所樓下等候，其間有一位短髮女子駕駛黑色房車出現，現場記者覺得她貌似年前環球創作歌手陳詩慧，只見她在車內向記者揮手似示意讓開，接着便匆匆離去，近年陳詩慧已甚少在港公開演出及出碟。
全城熱話
梁詠琪：涉及利益就唔好
自從陳志雲涉貪污被廉署拘查後，至昨日他舉行記者會首次正式見記者，現場見他精神不俗，但明顯消瘦不少，難怪令不少圈中人向他送上問候。
梁詠琪
我都有留意新聞，之前都做過陳志雲訪問，但係大家唔算熟，我又冇簽TVB，大家冇乜接觸。冇簽會唔會係明智，各有所求啫，我近年都喺內地多，不過簽TVB真係有好多曝光機會。至於有傳有人送補品畀高層，咁可能人哋身子弱啩，不過如果涉及利益就唔好。
鄭嘉穎：我真係冇送禮
我冇話乜嘢黨派，我做好本份就夠，唔會理呢啲，呢啲係記者分畀我哋，唔係我哋自己分，之前都有記者朋友打嚟問有冇送禮物畀高層，我話真係冇，其實篇報道內文都冇提及我，所以我都覺得好費解。
楊怡：怕佢精神唔好
希望陳生身體冇事，怕佢精神唔好，希望佢快啲冇事啦！講到有人向高層送禮，我只係會喺中秋送月餅，新年派開工利是。至於又有指某高層想賣車，有啲人為討好高層而爭相出價，如果我搵到錢，我都想放車，都會問身邊嘅人。
楊千嬅：高層收禮咁激
我聽過歌手都要接受ICAC嘅問話，我喺TVB嘅工作都係由公司安排，至於演出啲騷，都係跟番歌星約啲騷錢去計。我唔知有乜嘢高層收禮物，咁激？我老闆林生（林建岳）都送過啲好貴嘅禮物畀我，我嗰啲只係心意，利是算唔算？總之入屋叫人，入廟拜神。
李克勤：祝福志雲冇事
我個人冇乜嘢意見，但睇到啲報道個心都唔係幾舒服，我都唔太方便講，咁樣對佢哋唔公平，公眾人物梗有人批評，我祝福佢冇事。
錢嘉樂：安排得幾恰當
我有睇陳志雲開記者會，佢依然都係咁淡定，幾好呀。其實我同佢唔太熟，不過佢咁出嚟開記者會都好，唔使大家估估吓，安排得幾恰當。另外，我都有sms畀Wilson（錢國偉），作為朋友梗係想佢冇事，但我都會尊重法律，希望件事快啲過，Wilson係綜藝節目人才，好多計仔，唔好浪費一個人才。