楊怡演出《宮心計》金鈴之後，除了演技得到更多人認同之外，連她的一舉一動都受到注目，無綫立即在收費電視台推出由楊怡、馬浚偉及謝天華主演的新劇《戀愛星球人》，對於第一次跟謝天華合作，楊怡嘆道日日也有事發生，連拍踢毽鏡頭也出事！
劇集《戀愛星球人》是一套圍繞星座的愛情小品，楊怡表示自己少女時代對星座之說也甚有研究。
處女座難覓姻緣
楊怡說：「嗰時讀書好鍾意買星座書睇，睇吓自己每日運程，又睇吓自己心儀對象運程，真係好得意，仲會研究吓太陽星座同月亮星座對自己的影響，不過家大個就冇咁沉迷，不過每次睇雜誌，都習慣會睇吓自己星座運程，睇吓有冇乜嘢大事要注意。」
處女座的楊怡要求高，又挑剔，為人硬頸又有潔癖，還有神經質，楊怡說：「我都唔係一個完完全全的處女座，我係要求高，但唔算挑剔，我鍾意乾淨，但唔係潔癖，至少我唔會好似我一個處女座的朋友，上佢架車要用紙巾抹鞋。性格係比較率直，有時都會多疑少少。」
對於愛情的期望，楊怡說：「我信一見鍾情，但係我應該唔會出現一見鍾情，可能我諗得太多，仲有蘇師傅話我5年內都唔會有真姻緣，所以都係以事業為重，賺多幾個錢先！」
踢毽中臉留紅印
楊怡笑言跟馬浚偉合作無數遍，甚有默契，新劇跟謝天華是第一次合作，她感到好玩又新鮮，她說：「唉！日日同天華開工都有事發生，我同曹敏莉就最慘，有次同佢拍個踢毽鏡頭，佢一腳就將個毽踢落我塊面度，之後成個紅印喺塊面度，佢冇走過來問我有冇事，淨係係咁笑！」她續說：「曹敏莉仲慘，佢玩到反腳甲，總之同親佢玩都冇好嘢喇！」
採訪：楊潔雯 攝影：陳順禎