港大買入西環青蓮臺漢華中學舊校舍打算改建做研究生宿舍，點知過唔到屋宇署一關，反建議港大拆卸重建，好多出身呢間愛國學校嘅紅人反對，事關青蓮臺舊校舍見證當年反英抗暴歷史，推倒重來萬萬不能。
中西區區議會噚日討論保育漢華舊校舍問題，屋宇署官員稱，按照現行法例，港大入則改建舊校舍唔會獲批准，重申要拆卸重建，或者唔做宿舍，做課室就冇問題。身兼漢華校友嘅中西區區議員陳學鋒批評屋宇署官腔，區議會一致通過保留漢華舊校舍，會去信當局要求彈性處理改建申請。港大花6,000萬元買入青蓮臺漢華，家如意算盤打唔響，八方好想知道，應該向邊個問責？