保育和風遍香港，繼留住永利街後，連議員通街掛嘅街板都有望保留，唔使讓路畀補選公投宣傳而拆除。早前當局要求區議員同立法會議員拆街板，騰空位置畀補選候選人掛競選街板，但遭保皇派群起反對，指冇理由為咗一次補選要佢哋花錢拆街板，選舉後又要使多筆錢掛新街板，勞民傷財多此一舉咁話。
削弱宣傳等同陰招打壓
政制及內地事務局局長林瑞麟見保皇派聲大夾惡，識相地從善如流，最新建議係唔使區議員同立法會議員拆除所有街板，只係將已辭職五個立法會議員沿用掛街板位置供候選人使用，同時騰出一啲政府部門或區議會掛街板位置出嚟做競選宣傳，政制局指五大選區平均每區有2,000個位置可供掛街板。
表面睇咁多位置掛街板，應該夠補選候選人使用，不過五區公投運動總發言人余若薇指魔鬼在細節中，事關議員掛街板位置，都係最顯眼地方，政府唔使議員拆街板，可供宣傳補選嘅街板位置恐怕好極有限，佢最擔心係政府是但求其畀啲山旮旯地方候選人掛街板，掛出街都冇乜人睇到，變相削弱公投宣傳效果，陰招打壓五區公投運動。
余大狀又指既然政府都話呢次係補選，票站安排同一般補選冇分別，掛街板宣傳安排應該都維持不變，否則因為有啲人「嘈一嘈、郁一郁」就隨便改變一貫措施，咁樣不但影響選舉公平、公正，更加開咗好壞嘅先例，原來選舉安排可以輕易改變咁兒戲，真係弊多於利。不過佢話其實特區高官已經出口術，揚言唔投票打壓公投o架啦，喺宣傳上都要打壓，實在欺人太甚！
林D9對保皇派言聽計從，不過保皇派都未必照單全收政制局建議，八方聽聞有保皇派對當局方案有微言，事關政制局表明，如果議員接受呢個補選唔使全港拆街板嘅建議，日後再有補選都會沿用，即係將來保皇派萬一有需要補選，宣傳機會都可能受影響，有議員私下稱，差啲俾林D9陰埋！
mailto:[email protected]