高清行人路之數碼達人：二代掌門人28載玩具見證

逛深水埗，永遠只認識高登，或龍蛇混雜嘅鴨寮街；其實行唔夠兩個街口，元州街有一間屹立28年嘅老式玩具店，當年揹住書包，呆望櫥窗嘅小學生，至今仍然係常客（不過頭髮已漸疏）；而穿上小校裙嘅妹妹仔，家亦變成福利模型第二代掌門人。這28年感情，一直無變！

記者：陳國輝
攝影：王文忠、譚盈傑

御用招牌貓睇場

福利模型算係全港少數嘅老式模型店。1974年於九龍城賈炳達道正式開幕，後來因拆卸關係，82年再搬到現址，唔覺唔覺，父女兩代經營已超過36年，屋企已移民往加拿大，現時只有Lily與阿姨兩人共同經營，佢哋唔識玩模型，只有一份堅持：就係希望買得開心，玩得開心。

■櫥窗沿用親友設計嘅電動展示架，當年不知引死幾多細路仔。

講起老店標誌，養貓似乎係例行公事，Lily話更有段難忘經歷：「早幾年，呢度同時養咗3隻貓，不幸因樓上有腐蝕性液體流入店內，其中兩隻喺急救時已經離開咗，剩低嗰隻家仲喺屋企。」近年，店內又養番一隻4歲嘅黑色小花貓，Lily話就算老街坊唔睇模型，亦會專登入嚟同佢玩。名字勁爆、叫「22號」，同日本動畫鐵人18有無關？就不得而知，但自從有佢，福利與老街坊嘅感情，已變得越嚟越深厚。

■佢名字叫22號，認真騎呢，
唔知同鐵人18有無關係呢？

■喺九龍城嗰陣，招牌上仍然
有個遙控器。

■用水晶設計嘅FookLe頸
繩，與模型玩具有極大反差。

店長熱門推介

MG藍色迷惘高達$270

MG悟空（超級撒亞人版）$255

GetterDragonGX-51$430

Mega高達（1:48）$680

難忘書包排長龍

店面唔算闊落，但只要你行入舖內，就會感到別有洞天；形容誇張？當你睇見模型盒堆放嘅情景，你或許明白，點解男人身邊嘅阿媽、女友、老婆，都極力反對你買模型返屋企砌！先留意天花，已經有現時兩層樓咁高，再睇真啲，原來模型盒已經像牆紙般，一盒一盒，越叠越高，甚至要擔梯先拎到。試諗吓：香港地一般小家庭居室得五六百呎，又點容許你變成一名模型發燒友！
採訪當日剛好喺中午食飯時段，人潮盛況，正如Lily所講：真係插針都插唔入！但對於經驗老到嘅阿姨，佢話八十年代嘅畫面原來仲誇張！
「當時班小朋友個個揹住書包，又重又大嚿，為咗唔想阻塞通道，也為咗保安問題，我就規定每個人入店前，要將書包放喺入口走廊；結果每逢放學時段，啲書包竟然排到出門口！」此情此景，家已經無發生，因為呢班揹住書包嘅細路，已經出嚟社會工作，甚至已成家立室！

1.咁多年來，逢周末下午店內依然係插針都插唔入。

2.以前太多細路唔知規矩、擅自拆盒，家唔講大家都知道了！

3.佢哋雖然係兩代人，但竟異口同聲話最鍾意玩Barbie同公仔，而唔係模型喎！

■小朋友掉番轉陪爸爸睇模型、買玩具，店長話經常見到。

仔陪老竇買玩具

福利的確見證住七、八十年代老街坊嘅成長：「家細路仔唔係拎住部NDS就係漫畫書，仲邊會玩模型o架！」阿姨話，顧客依然係老街坊為主，但身邊陪同嗰位已經唔係同學仔，而係女朋友、老婆，甚至拖埋自己個仔！老竇陪仔買玩具就聽得多，點知喺福利，原來係仔陪老竇更多，阿姨仲話，班老顧客會將佢以前玩遙控模型嘅威水史，走去同班仔女講，話要感染埋佢哋一齊玩！

a.福利模型（23860233）
地址：深水埗元州街66A地下

街坊Guide你
深水埗腦場黃金夢

相信無人反對，黃金同高登係腦界發燒友嘅朝拜聖地！由從前嘅任天堂、組裝電腦年代，以至現時Notebook、LCDTV，甚至高清機頂盒等，AV界品種無奇不有！既然嚟到深水埗，不如搵埋幾位資深腦場Sales，等佢做導遊，帶各位入去掃平嘢！

黃金電腦商場

6"PMP一千蚊有找

店員阿榮介紹呢款AinolV8000-W，牌子未必認識，但屏幕勁過iPhone多多聲，再者佢支援直插手指播片及較長播放時間，8GB僅賣$890，仲唔算抵玩！