今時今日的歌手賣唱片，賺到的只是皮毛。但時來運到，張敬軒遇上人生伯樂契爺陳鼎禮，即時升呢由歌手變老闆，軒仔強調不會變得一身銅臭，但同意無奸不成商這道理，他表示最怕被誤解：「契仔好似俾人包養。」
張敬軒在港發展越來越順暢，去年尾更榮升老闆，在契爺、牆紙大王陳鼎禮幫助下，開設經理人公司，自己打骰話事。自由度更大，喜歡接甚麼工作也行，找個藝人回來力捧也可以。
「做藝人唔穩定」
軒仔說：「入行開始已經覺得要有自己公司，我較主觀，而且做藝人太唔穩定，冇乜安全感，命運好似唔係自己決定，同埋入行10年，用呢啲經驗去做。今年覺得係時候做，又遇到貴人陳生，即係契爺，佢同契媽當我半個仔，知道我想做生意，話入股等我唔使風險咁大，唔想我啲辛苦錢蝕晒。」
突然升呢，軒仔由歌手變商家，但他強調不會慢慢變成滿身銅臭，他說：「我唔覺得升呢，我有諗過啲人會唔會覺得我靠黐，係有呢種顧慮。我家狀況係好咗，但我強調會自力更生，唔會變成太子爺，要揸靚車、住靚樓。」
軒仔因此認識到很多城中富豪，早前上契晚宴，城中富豪如劉鑾雄、鄭裕彤和李民橋等也有畀面出席，軒仔識做地滿場飛招呼賓客。最初出席場合遇到不同階層的人，軒仔難免多疑，他說：「去呢啲地方好驚，佢哋有錢人，你係小明星，人哋以為係嚟搵食、打關係，會諗賓客點諗自己，同兩夫婦（契爺契媽）扯上關係，契仔好似俾人包養，但原來大家都係萍水相逢，大家真心地去傾偈，並唔虛偽。」
做生意忌怕蝕底
軒仔從契爺身上學到不少做生意的技巧，他說：「參考例子好多，傾生意要靠把口，要口才好，而且做嘢唔可以怕蝕底，一開始做嘢唔好太計較得失，同埋做嘢要光明磊落。」軒仔堅持要做老實商人，他說：「係o架！但無奸不成商，其實奸都只係當人哋未察覺到嘅商機要把握到。」
採訪：王連連 攝影：陳慧安
服裝提供：RageblueAndHare
場地提供：TheGatewayHotel
