自從拍完無綫劇集《五味人生》後，關詠荷再度暫別娛樂圈當全職媽媽，不過她仍偷空工作搵真銀，實行和老公張家輝同心協力拍住上。昨日關詠荷便要出動美食來分散囡囡的注意力外出工作，與女子組合HotCha成員Regen合作拍廣告賺奶粉錢。
關詠荷（Esther）昨日與女子組合HotCha成員之一Regen在尖沙嘴拍攝燕麥片廣告，這是她們繼無綫劇集《五味人生》後再度合作。談到今次酬勞，Esther笑說：「當然滿意啦，聽講佢哋呢個產品想進軍內地市場，所以我都希望可以繼續合作。」
「個女叫唔好返工」
自從拍畢《五味人生》後，Esther便暫別娛樂圈，繼續做全職媽咪，只是偶爾拍廣告搵奶粉錢，她說：「其實拍廣告同拍戲唔同，拍廣告嘅時間唔多，我出門口嗰陣同個女講好快返嚟，而且仲會帶啲好好食嘅嘢返去，所以個女先冇問題。以前我開工嗰陣，我個女會叫我唔好返工，等爹哋出去做嘢咪得囉。」
自從做了媽媽後，Esther很注重食物質素，她自己也減少吃膽固醇太高的食物，她說：「我一向都好鍾意食大閘蟹同鵝肝，但係家輝叫我食少啲，不過有時見到都好難忍口。」
注意飲食隨時生B
問Esther這麼注意飲食，是否為再生BB而做好準備，她笑說：「唔係，呢方面順其自然啦。」被問到有否留意最近無綫的風波時，她說：「我呢排淨係掛住搞廣告嘅事，冇乜留意呀。」
採訪：何慧斯 攝影：彭琮然
