蟄伏多日嘅志雲大師噚日公開亮相，幾分鐘記者會談話內容言簡意賅堪稱句句金，志雲被扣留廉記時，自稱係志雲國際後援會成員嘅女子送湯「打氣」，其中一個係網上電台節目主持人愛明，愛明噚日都有去九龍富豪。
外界以為愛明諷刺志雲，佢強調只係針對TVB，「我係真心欣賞陳志雲，佢俾廉署查，我個心都隱隱作痛。」愛明稱噚日到場真係想為志雲打氣，「佢都係身不由己，一夜間冇晒朋友，好慘。」志雲噚日記者會表現瞬即成為全城熱話，愛明話知道志雲開記招感到喜出望外，又讚志雲表現「好搞笑」，「冇諗過會咁樣開記者會，佢有自己演繹方式，咁樣講嘢，係佢一向作風。」忽然現身嘅陳志雲，唔知幾時再蒲頭，愛明話會繼續捧場，義無反顧支持志雲。