《志雲風暴》【本報訊】廉政公署昨日指出，容許被拘留人士在安全環境下梳洗剃鬚。據悉，陳志雲昨日說被拘留期間剃鬚時不小心被剃刀割傷臉頰，他所使用的「剃刀」其實是由廉署提供的即棄式塑膠柄鬚刨。廉署人員「感激」陳志雲離開廉署總部時戴上口罩，以防外間誤會廉署曾對他使用武力，但對於陳志雲回家前急於剃鬚，資深廉署人員說：「咁多年嚟未見過有咁姿整嘅拘留人士」。 記者：謝明明、王麗春
陳志雲昨日在記者會透露曾在廉署剃鬚割傷臉頰，引發被拘留者可使用剃刀的疑惑。廉署發言人接受本報查詢時表示，根據《廉政公署條例》附件，廉署會有足夠梳洗設施，供被拘留者在足夠的人身安全環境下使用，「在確保被扣留者不會逃走或傷害自己而需要的監管及其他措施的規限下，被扣留者須獲給予足夠的設施及機會，以便能洗濯、淋浴、剃鬚及如廁，並做適量的運動。」
保釋後可廉署內剃鬚
消息人士稱，廉署一向不容許被拘留者使用一般剃刀，防止拘留者自殘或用作武器危害其他人士，「唔好話剃刀，就算係皮帶同鞋帶，拘留人士都要除晒交出嚟。」據悉，陳志雲所提及的「剃刀」，其實是即棄式塑膠柄鬚刨，「即係酒店同飛機上供應畀旅客用嗰種。」廉署不會監視拘留者梳洗，以免侵犯私隱。
廉署的拘留中心亦設有浴室及床鋪，供被拘留人士使用，「浴室設有打唔爛嘅鏡，防止拘留人士打碎鏡片，傷害自己。瞓覺亦冇規限，當然要配合調查同視乎當事人嘅身體狀況。」
如果拘留者要求使用一般剃刀剃鬚，消息人士稱：「咁只有等辦完保釋手續離開拘留中心，唔再係拘留人士身份，就可以喺廉署廁所或者私家車上面剃鬚，廉署就唔會干涉。」
「一般人只想盡快離開」
據悉，廉署人員昨日有收看陳志雲記者會直播，陳解釋由於不小心用剃刀割傷臉頰，所以離開廉署時戴上口罩，以防外間誤會，有廉署中人笑說：「佢咁為廉署着想，就真係要多謝佢。」
不過，對於陳志雲獲釋後不忘剃鬚保儀容，有資深的廉署人員直言，「咁多年嚟我都未見過有咁姿整嘅拘留人士，坦白講，換着一般人被拘留咁耐，都只係想盡快離開廉署返屋企，呢啲嘢（剃鬚）咪返到屋企先做都未遲啦。」
陳志雲記者會講話全文
各位傳媒界嘅朋友，大家好，由3月12號到到家，我一直冇公開露面，主要嘅原因係因為經過3月11號同埋12號呢兩日，見到咁多位嗰種盡忠職守嘅採訪表現（微笑），令我憂慮到如果唔係喺一個安排好嘅情況之下公開現身，（嘴角微微向上）可能會影響到大家自身嘅安全、引起混亂，又或者導致到使用緊同一個公共空間，又或者係私人空間嘅其他朋友不便。所以我希望藉住今日呢個咁有秩序嘅安排，同大家見面，滿足大家喺工作上嘅需要。（淺笑）喺往後嘅日子，大家唔再需要喺我屋企門口度等，（語重心長）咁多日以嚟，辛苦咗大家。
正如先前Ivan（陳的代表律師鄧耀榮）所講，由於案件仍然喺調查嘅階段，所以請大家見諒，我今日唔能夠提及有關案件嘅任何細節。不過有一啲大家有興趣知道嘅事，我都仲係可以一提。例如3月12號，點解我離開ICAC嘅時候會戴住口罩嘅呢？（甜笑，台下起哄）我知道有好多朋友喺出面等緊我，所以離開當日，我係嘗試整理一吓自己嘅儀容，不過好可惜，我唔小心用剃刀刮損咗塊面，我戴住口罩，係避免大家誤會我面上嘅傷痕，係嚟自ICAC。（台下有人大笑，陳志雲停頓數秒）
大家喺媒體上睇到嘅報道，唔一定係事實。喺12號至到17號期間，所有嘅報道都指出我係藏身家中，事實上並唔係咁，我一如以往，有外出同朋友見面，出街食飯，唔單止係17號，亦即係昨晚，俾部份傳媒影到嘅嗰一晚，仲去過公立醫院嗰度覆診㖭。至於其他與事實不符嘅報道，我唔一一舉例說明。
喺呢度，我由衷咁向連日以嚟（瞇眼、深情感激狀）同我發出無數短訊、問候、關懷、支持，同對我表示信任嘅朋友，深表謝意。當然我亦都要好感謝旺角花墟嗰位賣碌柚葉嘅老闆，多謝你嘅買一送一。（台下笑）
我想同大家講，我生活得好好，唔需要為我憂慮，但係講到底，我嘅生活上面係咪完全冇起到變化呢？呢一點係冇可能嘅。但係想深一層，有邊一個人嘅生活，從來冇遇上過變化呢？如果你（極重鼻音）都遇上咗一啲變化，一啲莫名其妙嘅變化，請你唔好驚、唔好亂、唔好放棄，（眼神堅定）因為真的假不了，假的真不了，多謝大家嘅支持、關懷同鼓勵。