如果你有一億元會買乜嘢？香港蘇富比建議買齊三款頂級珠寶首飾──「千禧藍鑽」、「白鑽項鏈」及「翡翠玉珠項鏈」。
呢粒千禧藍鑽有5.16卡拉、梨形切割、內部無瑕，具有最高評級嘅鮮彩色，係同類珍品中嘅頂級，仲係DeBeers千禧珍藏之一，估價3,600萬至4,000萬港元。白鑽項鏈係由50粒無論切割、打磨同對稱度都係完美嘅白鑽組成，比同類白鑽更加閃，估價3,200萬至4,000萬港元。而價值最高嘅翡翠玉珠項鏈就由35粒翡翠玉珠串成，粒粒都又大又綠，估值3,800萬至5,000萬港元。
包括以上三件嘅320件珠寶首飾將會喺下個月7日拍賣，蘇富比話近年多咗大腕競投名貴珠寶，預期成交額會比去年同期好。