美式桌球美女如雲，擁34C咪咪嘅台灣球手張舒涵，雖然喺去年底嘅香港東亞運成績同風頭，都不及南韓靚女車由蘭，但新一年佢即時轉運；先成為中國嘅桌球品牌代言人，更取得美國女子職業巡迴賽（WPBA）整季參賽資格。
綽號「人氣小天后」嘅張舒涵，初出道時已經「睇得又打得」，除咗幫過台灣嘅珠寶公司做代言人，今次轉去大陸搵人仔，收入更加和味；佢同中國桌球品牌康泓簽約兩年，袋走150萬台幣（約36萬港元）。着靚衫拍廣告，當然難唔倒張舒涵，簽約當晚佢仲穿上黑色低胸吊帶裙，大晒34C驕人上圍㖭！
美巡賽處女戰得亞軍
張舒涵喜事仲接踵而來，上月中佢以亞洲區資格賽首名身份，到美國加州貝爾弗勞爾市（Bellflower），參加美國女子職業巡迴賽（WPBA）地區巡迴賽錦標賽，結果越戰越勇，攞埋冠軍㖭！雖然獎金少少哋只有1,400美元（逾1萬港元），但最緊要係取得今年美國女子職業巡迴賽資格，而佢係繼陳純甄同黃欣後，第3位獲此資格的台灣球手。
巡迴賽首站本月10日已經喺加州聖迭哥舉行，除咗世界一級球手，連南韓靚女車由蘭同中國嘅潘曉婷都有參加；結果張舒涵越戰越勇直闖決賽，可惜最終屈居亞軍，但成績已十分不俗。
張舒涵小檔案
國籍：中華台北
出生日期：24/11/83（26歲）
威水史
＊2007年亞室運女子9號球個人賽金牌
＊2008年鹿城盃中國女子9號球精英賽冠軍
＊2010年美國女子職業巡迴賽首站亞軍
