政務司司長唐公子山頂官邸噚晚好熱鬧，娛樂大亨林建岳、前高官葉澍堃、小小超李澤楷同名嘴鄭大班夫婦，大約喺7點鐘左右前後腳現身，據講唐公子請食飯，仲有其他賓客，難怪星光熠熠。
老友岳少出席
岳少同唐公子十分老友，曾一齊搭私人飛機去法國嘆紅酒美食，葉澍堃亦係識飲識食之人，退休後變身食家，又係岳少旗下上市公司非執行董事，總之係老友啦。至於李澤楷同大班，同唐公子亦有偈傾，約食飯唔怕冇話題，雖然有人攜眷，不過梁洛施冇到，可能要靜心養胎（傳聞佢又有咗）。呢幾個人最少有一個共通點，就係應該唔會支持梁振英做特首。據稱噚晚餐飯只談風月，不談政治，亦冇講被人掟鞋驚險過程。唐公子請食飯，自然唔少得佢珍藏名釀，呢方面唐公子向來好慷慨，唔會令朋友失望。李澤楷旗下盈大地產去年被中央台指囤積土地，早前更被罰錢兼禁止喺北京買地，佢已派人北上拆解，噚晚咁好心情飲酒，單嘢應該搞掂。