喺我眼中，四驅就係大大份，粗獷味十足，可以翻山涉水，一身歷盡滄桑後花斑斑嘅車身……不過玩四驅嘅人聽到我咁講，一定覺得好膚淺，因為唔少四驅迷都有鋪「裝身」癮，同一種型號，都可以有唔同嘅扮靚方法，好似呢班DefenderFans嘅車就令我知道，四驅都可以幫佢扮靚要嚟錫。
記者：趙慧敏
攝影：梁細權
鳴謝：香港越野路華四驅車會
Fire一味要靚
呢日，我就參加咗個DefenderFans嘅活動，見證咗佢哋嘅「扮靚」大法。個人覺得最搶嘅要算呢部冰火特別版之一嘅Fire，四驅之中屬靚仔一族，橙撞黑車身夠晒搶，仲要只係限量生產850架，香港只得約10架，夠晒矜貴，咁就當然更得寵啦。錫佢當然就要落足本為佢扮靚，呢部Fire嘅裝身主題都係以靚行先，自己設計襯番「Fire」之名嘅獨家圖案拉花，為本來已經搶眼嘅外觀再添獨有元素。加個頂架及一列射燈，再催谷型格。一直覺得射燈係四驅嘅靈魂，要氣勢靠晒佢，但呢部車最有趣嘅燈飾反而喺車尾，車頂一排尾燈用LED燈組，每個燈都好似花形圖案咁散開，黑夜中必定靚到爆。我以為四驅車「傷痕」纍纍就叫做型，幾時會見車尾鋪晒地毯，更做埋櫃桶層架，車主話唔鍾意行車時工具發出雜音，影響駕駛樂趣喎。再一次印證，今時今日嘅四驅唔係幫你捱，而係陪你嘆。
點睛位係LED尾燈組合，夠氣勢。
90瘦身玩軍車Feel
另一邊廂有人就喜歡強谷四驅嘅粗獷本色，呢部90就俾車主迫「瘦身」。本來已經係開篷版，車主拆篷之餘仲拆埋篷架，將部車變成全天候，更連個車窗框嘅車門都拆埋，換上咗軍用門板，擺到明玩軍車Feel。唔好以為開篷版連個頂都無埋，車款一定好單調，加番個防滾架，有型之餘亦大大提升保護性。
110用架生扮靚
四驅車身經百戰，有時真係唔可以淨係貪有型，實用性一樣緊要，所以用架生裝身幾時都係大熱。誇張頂架加金屬梯，有姿勢又有實際，加埋泥剷、鋼纜同拖架，救車時更加幫到手。睇埋車櫳，裏面雜物一籮籮，駕駛座附近又導航又一大堆燈掣，「打扮」實際，靚在有真正越野味。
