本田（Honda）車廠同豐田一樣連番出事，繼早前要全球維修同回收逾100萬架汽車後，日前喺美國又要收番兩款、約共41萬架有煞車問題嘅汽車。呢個「本田」唔掂，好彩另一個「本田」為日本爭番口氣。邊個「本田」？之唔係大和新晉球王本田圭佑（KeisukeHonda）囉！佢一傳一射，送咗莫斯科中央陸軍入今屆歐聯8強。
身高6呎、將個頭染成香檳金嘅Honda仔，08年1月由名古屋鯨魚加盟荷蘭嘅芬洛後，踢咗兩年就響朵，結果喺今年1月冬天轉會市場俾中央陸軍睇中，出900萬歐元（近1,000萬港元）將佢收購旗下，仲同佢簽4年。
一傳一射領陸軍入8強
呢位23歲中場適應力好強，話咁快就融入球隊；喺主場打和西維爾1:1嘅歐聯16強首回合，本田圭佑表現唔錯，射幾腳都似模似樣。到前晚次回合佢踢得好搶鏡，先喺38分鐘助攻予尼斯特開紀錄，之後再喺55分鐘射入罰球，令中央陸軍最後贏2:1，總比數贏3:2出線8強。
當然，如果唔係西維爾門將柏立犯錯，Honda仔呢球未必入；但講番轉頭，都要佢呢腳夠勁至得。點都好，佢以一人之力幫中央陸軍17年嚟首次入歐聯8強，經已上晒位；佢仲係首個有機會參加歐聯8強嘅日本球員。本田圭佑賽後話：「我冇興趣做第一個打乜乜嘅日本球員。我嘅目標唔止8強，希望可以去遠啲！」
講到自己個入波，Honda仔咁話：「球波我食得好應，加埋對手龍門幫我一把，咁就入咗。」眼見一班日本球星好似小野伸二、稻本潤一同中村俊輔都由歐洲回流日本，Honda仔算係幫日本球員爭番口氣，證明佢哋仲有能力打頂級賽事。如果中央陸軍8強抽中對曼聯，Honda仔就有機會同朴智星，合演日本對南韓嘅亞洲打吡，肯定好有睇頭。