林D9前日扮演「親善大使」破天荒親自踩上民主黨總部就政改「拉票」，有「人肉錄音機」美譽嘅佢自然不負眾望，講來講去都係2012年選舉方案而唔係終極方案，呢次會面冇實質成果，客氣啲形容最多係各陳己見；噚日有報紙卻引述林D9說話，大字標題指民主黨已同政府有共識，搞到民主黨員噚日受盡揶揄，被笑該黨大局為重，同政府傾掂數。
民建聯黨團召集人葉國謙恭喜卿姐，點知卿姐嬲爆爆話：「邊度有吖！」似乎暗嘆有傳媒捉錯用神。終極普選聯盟約咗民建聯幾位大佬下周二開早餐會，葉國謙先小人後君子，表明不會承諾2020年全面取消功能組別。