十年樹木，百年校園。一百年前嘅3月16日，香港大學舉行本部大樓奠基儀式，捐款起樓嘅麼地爵士將金灰匙交畀港督盧吉。一百年後嘅3月16日，捐款人第五代孫麼地（ChristopherMody）教授將灰匙交畀特首曾蔭權，完成「時空交錯」嘅港大百周年校園奠基禮。
校園問題一直令港大校長頭痛，「1938年喺度讀書嘅時候，得幾百個學生，家萬幾個，梗係唔夠位啦。」任期1972至1986年嘅港大前校長黃麗松，年屆90但中氣十足，「我細過本部大樓10年咋。」佢話港大起喺半山，平地少，曾經有人建議搬去新界，佢堅決反對：「wehavetoservethecommunity（港大要服務社區）。」
黃麗松爆同政府講數
黃校長好鬼馬咁爆當年點問政府攞錢擴建校舍。當中大、城市理工（城大前身）等紛紛落成，佢乘機同政府講數：「你都批咗唔少錢佢哋，應該到港大囉喎。」於是港大校園也能慢慢擴大。
大學普及化，校園仍然唔夠用。1986至1995年統領港大嘅王賡武校長，當年已經打黃克競大樓附近嘅配水庫主意，可惜「當年技術上很困難，成本又高。」佢話百周年校園，實現咗佢嘅「奇想」，將嗰兩個海水配水庫，搬到附近人工岩洞，騰出空地建校，係全港首個類似工程。
1996年接任至2000年嘅前校長鄭耀宗就話：「Mydreamcomestrue（夢想成真）！」佢話自己15年前開始構思百周年校園計劃，終於冇白費。不過，發完夢都要返番去現實，現任校長徐立之話，百周年校園工程家仲欠10億元，「我會盡量努力，但就算搵唔到錢，借錢都要起。」
麼地教授想睇麼地道
麼地教授話同徐校長喺加拿大係舊同事，今次專程嚟。佢話知道麼地家族喺香港嘅歷史，有朋友專登喺香港嘅麼地道、麼地廣場等影相畀佢睇，佢今次都好想實地睇吓。
一百年前，波斯裔印度富商麼地（HormusjeeNMody,1838-1911）與當時嘅港督盧吉係好朋友，並捐助15萬元成立咗香港大學，政府為感謝他對香港社會嘅貢獻，於是將當時位於尖沙嘴一條新闢街道，命名麼地道，又將鄰近廣場命名為麼地廣場。
mailto:[email protected]
