【志雲難局之劃清界線】許志安、蘇永康、梁漢文及張衞健組成的BIGFOUR，前晚在紅館舉行尾場演唱會後，澄清演唱會監製一直都是陳家倫，捲入貪污案的無綫監製錢國偉只是友情客串幫手度橋。四子又指因沒時間故未有跟錢國偉聯絡，但會祝福他，至於陳家倫及捧場的無綫高層樂易玲均拒絕回應事件。
許志安、蘇永康、梁漢文及張衞健前晚在紅館舉行BIGFOUR尾場演唱會，事前爆出演唱會因監製錢國偉被廉署拘查，要由另一監製陳家倫頂上，康仔前晚說：「一路係陳家倫，海報都係佢名。」安仔則說：「其實我哋四個都同錢國偉識咗好耐，佢係義務幫我哋度橋，我哋太熟喇。」
樂易玲封嘴
提到錢國偉近日捲入貪污案，安仔說：「我哋梗係想向佢問好，我哋會祝福佢。」梁漢文謂：「作為朋友係擔心佢嘅，我哋每日做騷冇時間打畀佢。」康仔續說：「唔好打擾佢啦，畀佢休息下。」健仔則說：「佢係相當有才華、永遠笑容掛喺面嘅導演同監製，希望佢可以順利過渡，乜嘢事都冇，作為朋友衷心祝福佢，其他嘢唔方便講太多。」
陳家倫在慶功宴上則迴避談及錢國偉，只說：「唔講呀。」前晚現身撐場的無綫高層樂易玲，也拒絕回應事件。
張衞健前晚在台上重演早年參加新秀時表演的側手翻及蜈蚣彈，跳到飛甩假髮，之後開心大叫：「第五場終於彈得起呀！阿媽我得咗，老婆我有心有力。」引得全場歡呼。演唱會兩度安哥始完場，安仔開心得踩上觀眾席的座椅唱歌，誰知站不穩跌倒，幾乎與樂易玲面貼面，後來安仔又向着樂易玲方向的觀眾大叫：「Iloveyou！」
香港難加場
BIGFOUR稍後會作巡迴演出，之前有報道指安仔不肯在香港再加場，以免影響他年底的個人演唱會票房，他前晚在慶功宴上不作回應，健仔即答道：「後面陳奕迅真係冇得讓，我哋最後一場都係佢讓出嚟先加到，唔關安仔事。」談到家眷是否每晚捧場，康仔說：「我阿媽係，女友就第三晚先喺巴黎返嚟。」健仔謂：「我老婆有一晚冇嚟。」梁漢文的妻子則晚晚現身，安仔不願談女友Michelle，只說：「我鍾意嘅人都嚟咗。」
採訪：王連連 攝影：陳順禎
全城熱話：君如獲高人讚好命
無綫總經理陳志雲日前涉貪污被廉署拘查，事件至今仍未降溫，連傳言教陳志雲放生搬屋避禍的高人苗師傅也成為全城熱門話題之一。
吳君如（圖）：
我同苗師傅有數面之緣，係圈中朋友介紹，但就唔係真係睇相，佢贈我幾句淨係話「好，好好囉」。我只知佢非常低調，連手提電話都冇用。
吳卓羲：
呢件事對我嚟講冇乜影響，我都係照開工，又冇俾人問話，以前演出應該都冇俾人壓價，因為公司係我嘅經理人，通常都係佢哋傾價錢，OK咗先再話我知。
周柏豪（圖）：
我有去澳門出席賀台慶騷，當時應該係計騷錢。廉署未有搵我話要助查，我對思潮呢間公司唔認識，不過喺澳門見過叢培崑，但係唔知佢係乜嘢人。壓價其實所有行業都有，賣車賣樓都有。
樂壇新人洪杰：
暫時冇收到話要協助廉署調查，做嘢壓唔壓價，價錢我唔係好清楚，通常傾完價錢做完先出糧，記得做翡翠歌星個騷係有錢，唔止車馬費。
筱靖（圖）：
亞視比較均真，車馬費還車馬費，酬勞另計。
戚黛黛：
唔好講壓價，就算接工作都係我自己去做，至於高層收禮物就唔參與批評，而幕前幕後生日搞生日會都好平常。
羅力威（圖）：
新人唔應該有價錢，我諗公司唔會虧待我。
