富豪第二代好多都有公職銜頭，但真係有心做嘢嘅唔算多，「大劉」劉鑾雄個仔劉鳴煒就好積極，佢同幾個商界友好搞咗個「香港精神大使計劃」，搵咗楊鐵樑做主席，劉鳴煒就做召集人。個計劃係要發掘同表揚能夠充份體現香港精神嘅人物同故事，宣揚延續香港精神。至於具體點搞，佢就堅持留番今日至公佈。
望保持香港競爭力
計劃搞手仲有織造廠老闆梁宏正，同控股公司主席陳仲尼，佢哋噚日約咗八方同一班行家預先講解。陳仲尼話，計劃係希望表揚港人拼搏同勤力嘅精神，保持香港嘅競爭力。
呢排大熱，喺柏林攞獎、仲帶挈埋永利街逃過清拆命運嘅電影《歲月神偷》，劉鳴煒話，佢兩公婆最近一齊睇完都好感動，太太睇完仲喊咗成10分鐘。佢話香港六十年代嘅人好捱得，但香港冇可能停留喺幾十年前，每個年代都好有特性，就好似80後咁，佢自己都係80後，佢話好多80後都勤奮，佢自己就抱住樂觀同勤奮嘅精神去打拼；佢仲話會訓練吓佢個囝囝，唔可以想乜就有乜。