推動五區公投運動總發言、公民黨黨魁余若薇，同狂砌五區公投運動嘅合和集團主席胡應湘照睇應該冇乜關係，但原來胡應湘夫人嘅水墨畫老師林逸之，同樣都係余大狀嘅老師，兩位都可算師姐同師妹關係。
林逸之即將喺3月19至23號聯同一班弟子包括余大狀在內，喺中央圖書館舉行水墨畫書法展覽，咁啱胡應湘都應承出任主禮嘉賓，兩位公投寃家都算狹路相逢。呢次余大狀嘅參展作品，除咗一幅「李商隱《淚》」嘅字，亦有由佢題字、囡囡作畫嘅共同作品。余大狀呢排仲就財政預算案提出書面問題，以225條提問榮膺今年「提問王」，詹培忠、黃宜弘同梁劉柔芬似乎好滿意份預算案，竟然做「冇問題議員」。