求驗客手記:一個禮拜要過3關 紅軍有可能 - 求驗客

求驗客手記:一個禮拜要過3關 紅軍有可能 - 求驗客

由周一呢7日起,對利物浦非常重要,將會決定佢哋今季唔會唔就咁玩完。前晚佢哋過咗頭關,但仲有次關同埋第3關要過;而我求大俠都希望佢哋可以好似《職業特工隊》嘅湯告魯斯咁,可以將唔可能完成嘅任務完成。

炒樸茅阿古蘭尼開齋

紅軍星期一喺英超大勝來訪嘅樸茨茅夫4:1,家以30戰得51分排第5,落後第4嘅熱刺一分兼打多場。但講真樸茅降硬班咁滯,個心都唔喺英超度,所以利記贏波係應該,唔代表佢哋叻。嚟緊星期四同埋下個星期日佢哋有兩場關鍵大波,分別係歐霸盃對里爾同埋喺英超對曼聯。對樸茅入咗喺利記第一球嘅阿古蘭尼賽後話:「我哋要一步步嚟。等踢完星期四場波,先去諗星期日場大戰。想入前4,我哋要贏好多場波,呢場(贏樸茅)係開始。」
爭緊歐霸盃嘅紅軍上星期四喺16強首回合以0:1敗走里爾,想入8強?喺星期四嘅次回合冇失波贏2:0就夠。為咗呢場波,領隊賓尼迪斯冇出今季入咗10球、之前喺英超連續上陣69場嘅古積特,仲喺74同埋80分鐘換走謝拉特同費蘭度托利斯(F托)。里爾實力同狀態雖則都喺樸茅之上,但利記始終有主場之利,所以都好有機會過呢關。
但話時話,謝拉特近排躁躁哋,繼上場英超對球證反V後,喺對樸茅時又向米高布朗開踭,好彩球證睇唔到咋!希望謝老四收斂吓,唔係遲早出事。

設計圖片

尾關鬥紅魔還看F托

踢完里爾場波,下星期日利記會喺奧脫福同曼聯合演「雙紅會」。論牌面佢哋輸晒,但唔好唔記得,喺樸茅場波梅開二度嘅F托就係紅魔剋星,上季佢就以一人之力幫利記作客反勝4:1;而喺今季首循環又發揮威力,入一球令球隊以2:0擊退曼聯。
毫無疑問利記今季令人好失望,但佢哋班波真係難捉,點都好,我求大俠都希望佢哋能夠將「不可能」嘅任務,變成「有可能」。

利物浦三個missions

任務1:英超主場對樸茨茅夫
日期:15/03
特工:阿古蘭尼
結果:贏4:1,任務完成
難度:◎

任務2:歐霸盃主場對里爾
日期:18/03
特工:古積特
結果:?
難度:◎◎◎

任務3:英超作客對曼聯
日期:21/03
特工:費蘭度托利斯
結果:?
難度:◎◎◎◎◎

註:以5◎為最高