Fashion嘅品味真係因人而異，之不過有時候前衞同難頂實在係一線之差，好似一向喺網壇打扮都係前衞、有型有格嘅「3哥」西班牙拿度咁，佢嘅新look竟然劣評如潮，令到佢真係顏面掃地！
係咩款戰衣搞到拿度都O晒嘴？咪就係佢出戰印第安韋爾斯網賽嘅嗰條泥黃色菱格紋「孖煙囪」囉，十足十中坑嘅睡褲，最慘係同佢上身嘅白色窄T唔襯色，亦唔同style，九唔搭八！
拿度賽後就半自嘲咁話：「呢條褲對我嚟講實在太潮喇！打完呢個比賽之後，睇嚟都係要將條褲收埋入衣櫃至得。」我求大俠都好明白，試問有咩人會肯着住條睡褲打網球？好彩拿度嘅心情並冇俾條褲影響，喺第3圈輕鬆以盤數2:0勝出晉級。