麗盛集團（1004）噚日宣佈，主席兼行政總裁黎亮以私人理由請辭，即日生效，理由係黎亮需要為家庭事宜增加承擔，主席兼行政總裁一職由原副主席李鋈麟接任。
市場傳聞，黎亮上個禮拜初因為奔喪返咗北京，點知喺當地被人調查。事緣早年佢喺內地有官司纏身仲未解決，家黎亮已經由北京返咗去廣州，但暫時唔可以返香港。據了解，黎亮近幾年都冇返過內地，都係因為呢單官司。有傳聞話，單官司糾紛只係得番一啲技術問題未解決，相信無幾耐佢就可以返香港，而官司本身並不涉及上市公司，只係黎亮個人嘅事。
麗盛集團發言人接受本報查詢時都確認咗，黎亮目前係因為家庭原因而身處內地，不過冇聽聞過佢俾人扣查或監視嘅消息；發言人強調，截至噚日為止，一直都可以同黎氏保持聯絡。
除咗係麗盛主席，黎亮自02年開始，一直係中電新能源（735）嘅副主席，直到舊年6月先至離開。仲有，黎亮喺銅鑼灣有間叫「飯堂」嘅粵菜館，曾蔭權、何柱國同劉鑾雄等名人都曾幫襯過㖭！
中央請金融高官 向投行華人埋手
國內高級幹部任命，一般都係由中共中央組織部決定，所以大家會見到，一個行業內唔同國企老總調來調去，好似香港政府啲AO（政務官）咁。不過，世事無絕對，金融海嘯之後，中央先發覺喺應對呢啲環球性問題嗰陣，少敢啲有金融實戰經驗嘅人才。
家佢哋計劃緊向外資投行嘅華人高層埋手，透過考試同埋用考核形式，為國內大型商業銀行同金融監管部門，選拔副總裁或副部級嘅管理人員，報效祖國。內銀市值最大嘅工行（1398）仲會作為引入人才嘅試點。
不過，唔係個個都有資格入選o架！睇吓中組部屬意嘅人選，每一個都身經百戰，包括德意志銀行中國董事長張紅力、瑞銀投行亞洲區主席蔡洪平、前高盛大中華區主席胡祖六、同埋就快出任瑞銀投行亞太區副主席嘅李山。
呢啲海歸派會唔會接受任命，冇咁快會知，但如果計劃落實，將會係01年內地委任史美倫做中國證監會副主席後、中央尋覓金融人才嘅另一次重大突破。
起居屋拒表態 黃志祥：政府識做
中央政府想搵高人睇住金融市場，畀吓意見解決吓問題，撬外資行叻人無可厚非。呢排港府係咁出招想幫樓市降溫，地產界高人都走晒出嚟發表意見，幫政府諗吓計仔。好似新世界發展（017）董事總經理鄭家純，建議港府復建居屋嚟解決市民嘅置業問題，點知新地（016）好似唔係企喺同一陣線，上個禮拜仲暗示咗唔贊成復建居屋，其他地產商又點睇？政府應該點做至啱？
華華噚日喺金鐘港麗酒店金葉庭門口，撞到食完晏嘅信置（083）主席黃志祥，唔知係咪費事加入戰團，黃生對於復建居屋一事不置可否，只係話「政府近日聽到咁多意見，應該識得做啱嘅嘢」，咁點樣先啱呀？佢就唔講嘞。不過佢噚日同地產及建造界立法會議員石禮謙食晏，食完晏仲雞啄唔斷，唔知有乜大事商量呢？華華聽聞金管局總裁陳德霖同政務司司長唐英年，只係早佢哋兩位一陣離開金葉庭，唔知4位係咪一齊食晏呢？
李華華
mailto:[email protected]