近期顯得乜事都關心嘅疑似特首候選人CY梁振英，噚日上港台同「80後」Roundtable總幹事林輝對談青年問題，CY一講80後就變咗人肉錄音機，講嚟講去冇嚟新意。難怪主持謝志峰都忍唔住問，「你明唔明白佢（80後）講緊乜呀？」CY為咗表明自己好明，就大讚林輝好代表80後。
節目上猛話關心年輕人住屋問題嘅梁振英，節目後被問到有乜好橋時，即耍手擰頭想推畀林輝答，但林輝笑住拒絕代答解圍，CY見避無可避，就模稜兩可咁話，無論採取任何措施都唔好影響樓市穩定性喎。惟獨回應唐唐早前遇到有人掟鞋事件，佢就好似早有準備咁接住答：「畀我會接住對鞋，哈哈哈哈！」