陳志雲因涉嫌貪污被廉署調查，從前呼風喚雨的他幾近眾叛親離─恩師大義滅親、愛將自身難保，連飯局腳友都急急跟他劃清界線。身處逆境總得依靠親友扶持，惟陳志雲雙親已故，又是獨子，孤單的路更難行。
陳志雲自設的「志雲困局」震撼全城，他自獲准保釋後，即返抵其位於亞皆老街雅麗居住所。日前他更停止手提電話服務，連無綫員工也找不到他。
父親肺癌逝世
曾是無綫大紅人的陳志雲，如今官非纏身，其他人即封口避嫌，人情冷暖一刻盡體驗。更甚是一手提攜陳志雲的方逸華大義滅親，幾位愛將密友崔建邦、寧進、叢培崑等又自身難保，他最敬重的雙親也於早年離去，心事更加無人傾訴。陳志雲要獨力應付輿論及廉署的窮追猛打，就算EQ再高，往後的路也相當崎嶇。
陳志雲是獨子，雙親對他影響甚深，他對母親的死更自責不已。當年他被委派到倫敦工作，母親突然心臟病發逝世，他自責若他留在香港，或許可勸母親求診。直到05年，父親也因肺癌離世，令他更感孤苦無依。現時陳志雲的心靈慰藉，相信除了他的契爺兼教他粵劇的名伶陳笑風及書櫃裏的《聖經》外，就是床頭那面反照人心的鏡子。
撰文：林妃
全城熱話
馬德鐘：冇送禮難怪冇獎
無綫總經理陳志雲及監製錢國偉涉貪污被拘查，結果連帶不少無綫藝員都要接受廉政公署的問話，但近日有傳甚至乎連歌星都成為調查對象，牽連範圍越來越廣。
馬德鐘：我冇送過禮物畀高層，唔知係咪真係得，唔怪得我冇獎。不過，其實公司對我好好，好多劇拍。我冇陳志雲電話，所以唔會主動聯絡問候，雖然我係去過樂易玲嘅生日party，但我係冇派o架，如果陳生叫我都會去，我有去家燕姐生日會，我係家燕派。
方力申（圖）：我有SMS畀佢，陳生都有回覆我話：『謝謝關心！』
曾志偉：我認識嘅陳先生係一個好人，我會企喺佢嗰邊，佢係一個好上司。
甄妮：我曾擔任第一輯《志雲飯局》嘅嘉賓，只同佢合作過一次，我聽到呢單新聞都嚇一跳，我從未有參與過佢助手公司搞嘅工作。講到有歌手做騷俾人壓價，我平時做外國嘅騷會要求一個價，至於中間人同主辦單位傾幾多錢，我就唔想知，佢如果攞得多我就好佩服。不過記得以前上TVB嘅《K-100》，每人有一百蚊一次車馬費，出席TVB活動就有紀念金牌，家屋企收埋幾十個呢啲金牌。
陳柏宇：有報道話全港歌手將有機會被廉署問話，我都有做過《翡翠歌星賀台慶》演出，如果真係需要，我會協助調查，但暫時未有廉署請我飲咖啡，不過我知道嘅嘢好少，因為我好少問酬勞嘅嘢。
