記協周年籌款舞會今年訂咗喺5月14號、星期五舉行。以往記協Ball通常喺九龍區酒店，好多次都揀喺洲際或美麗華舉行，今年移師港島區嘅金鐘萬豪酒店，地點方便唔少記者寫完稿仲趕得切參加。
今年記協Ball仲請到首席法官李國能做嘉賓。即將喺8月底退休嘅李官，係新聞界前輩，早年做過《遠東經濟評論》記者，更曾入監倉訪問過當時因為六七暴動而坐監嘅曾德成（現任民政事務局局長）。相信李官對新聞界有唔少感情，特別喺退休前幫記協同記者打打氣。記協希望經濟好轉，有心人可以買多幾張枱捐助一下。八方就最希望記協請埋曾德成做嘉賓，到時佢同李官合演一幕當年今日，畀大家回味一番。