周杰倫緋聞無數，真係認過嘅女友大概只有蔡依林（Jolin）同侯佩岑，早排周董先話願意去飲侯佩岑結婚酒，以表自己做人大方，點知原來佢仲想拉攏舊愛Jolin同自己做同門歌手。早前雙J俾人發現一齊打保齡之後，近日又傳出周董有意力邀7月約滿華納嘅Jolin過檔杰威爾，搞到華納大中華區總裁陳澤杉開出過億新台幣天價留人，仲開到口話：「我們跟Jolin在3月底前會完成簽約華納的合約流程。Jolin是知恩圖報的人，我相信我和她的默契。」咁講法，擺到明受到威脅出口術，叫Jolin飲水思源啦。
勁讚舊愛係人才
其實07年周董已經搵過Jolin過檔，但嗰次唔成事，今次就唔同講法，但無論去定留，相信關鍵係Jolin7月推出佢同華納合約期內最後一張碟嘅宣傳做成點，當然係睇成績好唔好先會決定續唔續約，陳澤杉應該好明白呢一點，所以佢話：「這張專輯會有很多國際性的跨組合作，投資超過5千萬元新台幣。」雖然華納方面講到好有把握留得住天后，但Jolin經理人王永良就保守好多：「華納開出很好的條件，我們在考慮。」不過佢補充一句話未同杰威爾接觸。而杰威爾發言人就話：「Jolin是一個很優秀的藝人，但我們對她的合約狀況不是很清楚，所以不方便多做評論。」