理大校長唐偉章虎年真係流年不利，有員工挖番啲陳年往事，話前朝高層賤賣資產，諗落其實同佢冇乜關係，不過唐校長噚日喺電台話，校方一定會徹查事件，獨立小組三個月後完成報告會交代結果。至於有調查小組成員向發信嘅教職員發律師信，要求道歉，懷疑影響調查公正性，唐偉章話呢個禮拜會交代。
今次事件係由於有校內職員做金手指，爆料畀傳媒先搞到咁大，唐校長就話，相信發信嘅職員出發點係為大學利益着想，以八方演繹屬於愛得深至爆鑊甘一類，校長唔信背後有陰謀。佢話理大以往成立附屬公司負責做科研，經營的確唔係咁理想，但佢話唔會有校董可以用低價投得大學工程合約。