上周恒指雖然升421點，但大市成交認真麻麻，升勢並無成交配合，審慎散戶一般唔會咁輕率入市，要等個市有明顯方向才會跟入。例如，大市成交有特大變化，又或者市場有新消息之類，換言之，大部份散戶都正在等明確的入市訊號。
大市波幅狹窄，不過個別股份表現都幾引人注目，好似瑞年國際（2010）呢隻虎年新股，上市至今表現都算對得住「入飛」捧場客，雖然上市係以下限價3元定價，但掛牌後股價穩步上升，一度高見4.47元，近日由高位回落，連跌兩日，上周五回升1%，收報4.02元。
瑞年業務主打氨基酸保健營養品，內地市佔率超過兩成，係最大供應商，於大陸近30個省市擁有超過4萬個銷售點；以市佔率計，遠遠拋離次名只得4.5%的對手，瑞年明顯係行業龍頭。
由於公司產品毛利率超過60%，盈利增長堪憧憬，係值得密切留意的股份，料年內表現可跑贏大市，不妨趁回吐時買入。
方星俠