近日香港幾間傳媒機構輪流有搞作，搞到傳媒自己人做埋新聞主角，首先係亞視股東內訌，要告上法庭解決，又有內地資本入股亞視；跟住有報業大亨公開批評亞視大股東，連續幾日受到記者追訪。點知無綫緊接住爆出志雲風暴，電視、報紙記者日日大篇幅報道最新情況。正當兩間電視台有意無意出現咁多新聞嘅時候，報業大亨旗下嘅記者突圍而出，噚日喺北京溫總記者會上，唔聲唔聲咁攞咗支咪，話之你間傳媒喺香港幾受關注，總之喺人民大會堂就成為香港傳媒代表。
星島集團大老闆何柱國日前「路見不平」，主動出席台灣旺旺集團老細蔡衍明嘅記者會「幫拖」數臭亞視現任大股東查懋聲，有人擔心佢會得罪北京，事關亞視係香港中央台，新老細王征有中央強大後盾，誓言要將亞視打造成亞洲CNN，身為全國政協常委嘅煙仔何，搞寸個party冇着數噃。
事實證明煙仔何呢個舉動，無損佢喺中央心目中嘅地位。噚日總理溫家寶記者會，唯一一位獲中央「欽點」發言嘅記者就係《星島日報》，證明煙仔何仍然係中央「愛將」。
星島喺北京攞到支咪，但兩間電視台就繼續有新聞搞作。亞視新老細王征今日就會亮相亞視嘅活動，下晝有個感動人物評選嘅記者會，佢做特別嘉賓，唔知新老細係咪會講吓佢話明要帶隊出埠，去北韓同緬甸親征採訪嘅計劃呢？呢頭亞視新人事新作風，嗰邊無記嘅陳志雲，呢幾日成村記者喺佢屋企門口等住有冇新發展。至於邊個台嘅新聞做得大啲，只有觀望事態發展囉。
記者扑咪「走寶」
講開噚日溫總記者會，八方仲聽聞有香港記者「走寶」。話說有記者喺溫總記者會完場之後一支箭標到台前向溫總「扑咪」，問「總理，能不能跟香港市民說幾句話？」可能香港記者習慣晒中央高層掂行掂過當你唔存在，又或者一早被中南海保鑣推到九丈遠，點知溫總真係停低，仲問番記者「你還想問我甚麼？」可惜得到溫爺爺親切回應嘅記者一時呆咗唔識反應，結果睇住溫總係咁離開。
mailto:[email protected]