看不見的弱勢社群，每日都跟我們活在同一天空下。當半山豪宅炒至每呎7萬元天價，香港仍有10萬人蝸居在籠屋與板間房：40人爭一個廁所，大小二便在床邊解決，每晚跟老鼠蟑螂同眠，過着難以想像的非人生活。社區組織協會跟藝術團體ArtWalk合作，後晚在中環蘇豪區舉行慈善展覽，讓市民聽聽隱蔽社群的悲歌。記者：黃偉駿
《破產富商》
我住嘅板間房好細，得一隻細窗，住到成個人好容易發。我同社署嘅社工講，可唔可以幫我申請恩恤安置，等我可以上樓住公屋。社工話：你仲未夠慘，大把人慘過你，再等吓啦。
我試過去立法會申訴部門求助，職員話愛莫能助，臨走時佢哋送咗一個包裝得好靚嘅禮盒畀我，裏面有一包米、一包薏米、一包綠豆同一支油，但係解決唔到我問題，我間板間房根本煮唔到飯。
流浪漢救命
以前我好風光，做海鮮生意，月入10萬蚊，有車有樓，身家過千萬元。點知世事無常，97年出現雪卡毒，海鮮生意大跌，加上之後爆發金融風暴，我嘅事業全軍覆沒，欠落一身債，要賣車賣樓，變得一貧如洗，老婆仲帶埋個仔走佬。
本來我萬念俱灰，打算自殺，買好晒啤酒、燒乳鴿、針筒，諗住食飽之後就打針。點知醉到不省人事，醒番嘅時候，有一個流浪漢走埋嚟，同我分享佢嘅悲慘故事，當我知道呢個世界原來仲有人慘過我，就打消咗自殺念頭。我之後流落街頭，喺尖沙嘴文化中心露宿咗足足三年，嗰度啲人個個識我，幫我起咗個外號叫「釣魚佬」。後來得SOCO（社協）社工幫助，先搬咗去板間房。
我家每月靠領取3,100蚊綜援生活，有近一半用咗交租。喺大埔道租咗個板間房，細到只係可以放一張床，每個月租金要成1,300蚊，呎租比起豪宅仲要貴。雖然住得唔舒服，總好過瞓街。家越嚟越多窮人，但板間房越嚟越少。
我試過搵工，唔想攞綜援。社署介紹我去灣仔大有商場見一份清潔工，一去到職員知道我只係得小學三年班程度，就話我學歷太低，叫我返去等消息。如果唔係SOCO嘅社工仲肯關心我，我呢啲人已經唔知死咗幾多。
《失業大廚》
諗起住籠屋嘅日子好艱苦，不見天日，瞓又瞓唔到。呢幾日天氣轉凉，但喺籠屋瞓就唔使冚被，因為人多空氣又唔流通；天時暑熱籠屋溫度隨時有40℃，可以死得人。想去商場凉吓冷氣，搵唔到位坐，就喺櫥窗邊坐低，即刻俾人趕走。
40人爭廁所
一個籠屋單位可以分拆三、四十個床位。每個床位只係得2呎半乘6呎，月租要成1,200蚊，呢個係我哋嘅安樂窩，食飯、瞓覺全部喺晒呢度解決。三、四十人爭一個廁所，有時肚痛起上來，廁所又有人霸住，惟有喺床邊用膠袋解決，然後包起丟掉，我哋講笑話係「荷葉飯」。
我哋喺床上煮食，床下底就存放食物，結果吸引好多老鼠、曱甴，有時夜晚瞓覺，啲老鼠喺床邊走過。都冇辦法，惟有繼續瞓覺。每次天氣潮濕，張床就會有好多木蝨，我都俾咬過幾次，又紅又腫，有啲皮膚唔好嘅朋友就慘，成身啲肉咬到爛晒，又冇錢睇醫生，惟有排隊輪街症睇專科，一排就唔知等幾耐，真係等到死都未睇到醫生。
冇人想住籠屋，但板間房越來越少，而且住板間房開支好大，要交一個月介紹費、一個月按金，仲有水、電按金，加加埋埋要四、五千蚊，你哋覺得好濕碎，對我哋窮人嚟講，係天文數字。
我以前做過大廚，收入唔錯，03年沙士我俾人裁員，家靠綜援。最近市道好轉，早兩晚去見份廚房工，月薪10,000蚊，本來好開心，點知老闆見到我就話：乜原來你咁老，返去等消息啦。
庫房儲備越來越多，但政府一味做守財奴。曾蔭權做過政務官，一定知道我哋籠屋、板間房居民嘅存在，佢有冇關心過我哋？冇，佢冇當過我哋係人，只係識得奉承啲有錢人。香港話係國際大都會，邊有人諗到仲有好似難民營嘅籠屋存在？
文藝界相助 引起國際關注
由一班本地文藝界人士籌組的ArtWalk，每年都會在中環蘇豪區多間畫廊舉行展覽，並將其中一晚門券收益捐助志願機構，社協是主要受助團體。去年ArtWalk將一間籠屋在中環公開展出，即在一班居港外籍人士之間引起很大迴響，更吸引海外媒體相繼報道。
為社協籌募經費
ArtWalk籌備人黃煒琪表示，去年的籠屋展覽帶來非常震撼效果，「我哋嘅入場人士，好多喺外國讀書，或者喺香港工作嘅外國人，佢哋感覺好強烈，完全想像唔到籠屋同板間房嘅存在。」去年金融海嘯冲擊下，最終該晚展覽仍籌得47萬元善款，全數撥捐社協。今年展覽主題是「無形＠香港隱蔽社群」，繼續展出籠屋、板間房居民的故事，希望喚起更多人對弱勢社群的關注。
社協主任何喜華說，去年展出的籠屋，之後已被一間教會接收，現時正在歐洲巡迴展出，將香港貧富懸殊真相，揭露予更多人知道。
ArtWalk現時是經費緊絀的社協主要捐助者之一，捐款佔社協每年本地籌款總額三分一。社協將於下月7日進行賣旗籌款，現正招募義工，有興趣可致電27139165。
無形＠香港隱蔽社群展覽資料
日期：3月17日*
時間：下午5時至午夜12時
地點：中環荷李活道27號地下SchoeniArtGallery
門票：成人430元、學生100元
查詢：社協：27139165
ArtWalk：JohnBatten97580048
*展覽舉行至3月27日，除3月17日晚外，其餘入場全部免費
資料來源：社區組織協會、ArtWalk