張智霖闊別舞台近八年，前晚再度舉行迷你音樂會，老婆袁詠儀匿在後台為老公換衫打氣，張智霖請來劉心悠、張繼聰及HotCha等擔任嘉賓，有短裙女歌迷趴在地上，慢慢爬到台前影相，相當搞笑。
近年重出樂壇出碟的張智霖，前晚在九展舉行音樂會，當晚舞台設計成酒吧，張智霖化身酒吧老闆與一眾嘉賓包括DearJane、HotCha、張繼聰及劉心悠演出。至於老婆袁詠儀全晚匿在後台為老公打氣，也為他換衫，認真體貼。
擺城黛戀上枱
張智霖演出期間，台下有位穿上短裙的女fans竟失驚無神趴在地上慢慢爬到台前影相，甚為搞笑，上山詩鈉及女兒也有到場看騷。
其中張繼聰和張智霖表演類似棟篤笑，張繼聰憶述當日認識張智霖的經過，他說：「我哋喺條濕滑公路上認識，當日落雨塞車，我喺車度突然見到我架dreamcar出現，但對方竟cut埋嚟仲爬我頭，我咪唔忿氣抽番去前面望吓係邊個，點知有個靚仔露出禮貌嘅笑容同我揮吓手，原來係Chilam（張智霖），雖然當時佢對住我笑，但佢可能心諗：『Cut你咪cut你，死未。』我哋有好多共通點，大家都姓張，又娶咗個又靚又有才華嘅老婆，又有個差唔多大嘅囝囝，仲有好欣賞嘅朋友城仔。」接着兩人同唱《對你愛不完》，張智霖唱完笑說：「大家都鍾意郭富城，鍾意熊黛林。」
張智霖也取笑張繼聰說：「我知有個人你好驚。」隨即唱出《如果我是陳奕迅》，張繼聰反駁說：「你估因為Eason我驚，舊聞講成年，唔係真，Eason人人都鍾意，我睇咗醫生，證明我膽生毛。」事後問到張智霖爆城城戀情，他詐儍說：「吓，冇喎，呢啲係城中熱話，我係塘邊鶴講兩句，我唔知真相o架。」
心悠唱歌腳震
劉心悠首次為張智霖在台上開金口唱歌，表現尚算合格，她坦言緊張到腳震，並表示之前曾跟陳潔靈學唱歌，但被批評不夠氣，叫她跑步練氣，但現在則沒有時間唱歌，她覺得做歌手太大壓力，故不考慮出碟做歌手。
採訪：馬建華 攝影：黃文成
