兩會會議曲終人散，會期內全球股市屏息靜氣，觀察中央來年於退市、息口、能源及經濟政策等新部署。結果沒有驚喜，亦沒有驚嚇，兩會平淡完結，但國策就有機會一反往年高調保增長的部署，轉為低調調控內部經濟結構。
隨着美國總統奧巴馬、大鱷索羅斯以至國際輿論一面倒炮轟中國，應把人民幣大幅升值，加息憧憬更高唱入雲。記得1、2月時，人行調升銀行存款準備金率，令人擔心黑色星期五重臨，再次於通脹數據發表後有所動作。結果，事實證明阿爺的手影冇咁易捉。周小川多次強調通脹只係稍為升溫，大家無謂咁天真以為加息嘅時間有得估。
總理溫家寶的閉幕發言措辭強硬，叫全世界對人民幣一次過升值死咗條心。雖然冇點名，但就暗示美國唔應該夾硬逼人仔升值，佢指出歐盟同美國出口去年分別降20%及17%，但當中對中國出口嘅減幅只係15%及0.22%，根本不存在人民幣低估問題，重申人仔繼續喺有管理下浮動，保持合理均衡水平，一次過升值嘅傳聞不攻自破。
中央拒滙率一次過大升
溫總對中美關係態度轉趨強硬，以美債作談判籌碼，再次開宗明義話擔心買美國金融資產有「閃失」，即係叫奧巴馬醒少少，中國可以隨時減少買美債。簡單幾句妙問妙答，可見中方於人民幣立場上絕不讓步，咁睇只有繼續慢慢升值嘅可能，大家唔好有過份期望。
特別值得一提，呢次溫家寶提到「第二次探底」，亦即係陶冬早於去年底提出，若容許人民幣一次過大幅升值，會吸引大量熱錢流入，迫使中央進一步收緊銀根，到時經濟有可能第二次探底。溫總好似幾Buy呢套，話要避免再探底，須調整經濟結構同通脹預期，潛台詞係今年工作重點唔同往年銀彈救經濟，而係低調咁固本培元醫內傷。
即係點？好似病人復元咁，內需繼續力撐，股樓炒風過火要壓，但力度一定唔會大，農村城鎮化將會係一大發展重點，控制通脹預期即係乜都唔畀加價，個別關乎民生嘅，好似中石化（386）嘅補貼可能會增加。
胡孟青