花旗股市上禮拜五窄幅上落，幾個主要指數變化輕微，不過歐元兌美元呈技術突破，有機上試1.41至1.42，對短期嘅股市有利。
港股上禮拜牛皮，等新消息突破。技術上，恒指10日線上破50日線現黃金交叉，呢個禮拜可以睇好啲，後市點走，要睇實滙控（005）同幾隻重磅內銀股。
中海油C輪17301：中海油（883）上周五報收12.88元，升0.78%。股價近日反覆上升，累積升幅唔算太大，但係走勢就好靚，向上睇14元，可以諗吓隻C輪17301。
隻輪現價14仙，2010年6月29日到期，行使價12元，溢價4%，引伸波幅37.2%，有效槓桿5.9倍，正股見14元，17301睇22.1仙，有五成升幅，正股跌穿12.40元，就沽咗隻輪止蝕。
俊樺