法拉利車隊迎來參戰F1的60周年「最佳禮物」，車隊在周日巴林站揭幕戰「包Q」，新加盟的兩屆總冠軍、西班牙的艾朗素封王，隊友巴西的馬沙獲得第2名；7屆總冠軍「車神」、效力平治車隊的舒密加僅得第6名。
法拉利車隊上季諸事不順，如開季連續首3站錄得「零」分劣績、馬沙更於匈牙利站排位賽發生差點致命的意外，但車隊於新賽季果然有另一番景象，今站巴林站賽49圈，而今仗勝負的關鍵為艾朗素在第34圈把握紅牛的維特爾的戰車出現問題超前，取得領先後一直領放至終點，加上馬沙第2名衝線，令車隊暫以43分領先車隊榜。今次亦為28歲的艾朗素自08年日本站後首個分站冠軍，難怪他賽後興奮地表示：「這場勝利對於我及法拉利來說都極具意義，今日真是特別、美好的一天。」
法拉利一洗頹風
法拉利今次順利贏得比賽，亦歸功於賽前兩小時決定更換疑似出問題的引擎，因巴林當地氣溫高達攝氏35度，而賽道高達攝氏40度，對戰車引擎等負荷極大，紅牛的維特爾的戰車便因零件出問題，最終將冠軍拱手相讓，隨後更被「黑帝」咸姆頓超前，最終他只能得第4名；而闊別車壇3年的「車神」舒密加最終僅獲第6名，隊友羅斯保則為第5名；此外，新轉投麥拿侖的英國畢頓僅第7名衝線。
綜合巴林外電
《花絮》
黑帝大呻似揸巴士
「黑帝」咸姆頓（圖）天不怕、地不怕，之不過佢就好似唔係好鍾意新例唔准賽車喺賽事途中加油，皆因佢話搞到部車重晒，仲以「揸巴士」嚟形容入滿晒油嘅情況，話轉彎嗰時就最為辛苦喎！唔知道咸姆頓如果贏唔到總冠軍，會唔會用呢個理由作解釋呢？
「車神」都攬楊紫瓊
國際女影星楊紫瓊（Michelle）周日就去咗巴林，現場感受F1揭幕戰嘅震撼感，之不過呢次Michelle去巴林都身負重任o架，就係宣傳道路安全活動，佢亦同丈夫FIA主席托特、「車神」舒密加等車手一齊大合照。
畢頓女友貼身裙打氣
每逢有F1賽事嘅地方都總有靚女撐場，巴林站亦都唔例外，之不過呢個國家信奉回教，唔准女性「袒胸露臂」。好彩唔少車手嘅另一半懶理，好似陪住畢頓爸爸（左）嘅道端謝茜嘉（右），就穿上盡顯美好身段嘅貼身裙為男友畢頓打氣，可惜畢頓只得第7，令人失望。
