明明是宣傳劉鎮偉的新戲《越光寶盒》，問題卻回到過去，離不開他跟周星馳合作的經典電影《西遊記》，劉鎮偉強調新戲跟舊作《西遊記》沒有關連，純粹向各類搞鬼電影致敬，新片雖然沒有了愛你一萬年的期限，可是觀眾一看也知道，《越光寶盒》是藉用至尊寶周星馳跟紫霞仙子朱茵的舊情，惡搞周星馳一番。 撰文：何永寧
借用導演劉鎮偉的時光倒流，回到15年前電影《西遊記之仙履奇緣》結局一幕，周星馳飾演的夕陽武士在銀川城樓上，向朱茵飾演的紫霞仙子示愛，配上盧冠廷的《一生所愛》，令這段愛情更加凄美，至今為人樂道，不過鏡頭外這對戀人最終卻分手收場……重回現實，15年後導演新作《越光寶盒》拍攝地點依舊，演紫霞仙子的仍舊是朱茵，但兩位主角就換成了鄭中基及孫儷。與《仙履奇緣》不同的，《越》片沒有周星馳一萬年的愛情期限，換了是借鄭中基口中說出「我嚟係要還番個心畀你」的金句，明顯是衝着周星馳而來。
拒在朱茵傷口灑鹽
雖然劉導不置可否，但言語間卻透露玄機，他說：「開頭搵朱茵時都有同佢講想佢上城樓拍番呢幕叫做一個了結，但最後都冇拍到。拍戲同做人一樣，無謂去到咁盡，好似喺人哋個傷口度灑鹽，要朱茵諗番起以前就太殘酷。」
雖然劉鎮偉惡搞周星馳的舊戀情，但他是圈中少數跟周星馳合作過而仍有偈傾的好朋友，劉鎮偉笑說：「邊個話佢冇朋友？佢不知幾多朋友，不過唔係圈中人，所以你覺得佢冇囉。星仔個人怕同人接觸，你打破到佢呢樣心結，就可以同佢溝通到。你話佢拍戲霸道，我反而覺得有人接受唔到佢嘅意見，覺得自己嘅地位同權力俾人挑戰，呢類人心胸窄。創作係互動，要互相交流至得，一言堂拍唔到好戲。」
借《回魂夜》訴心聲
劉鎮偉跟周星馳稱兄道弟，原來亦有段互不信任的時期，話說當年拍完《賭聖》等一系列影片，兩兄弟雄心壯志拍了兩集《西遊記》，但事與願違。劉鎮偉說：「好記得嗰日同佢食早餐，前一晚剛剛上完《西遊記》午夜場，套戲俾人鬧到死死吓。嗰一刻我見到星仔對我嘅信心有動搖，嚟緊仲要拍《回魂夜》。」該段時期劉鎮偉一邊要寫《回魂夜》劇本，一邊要面對朋友不信任，感覺痛苦，最後把心一橫將自己想法投射在周星馳在《回》片的角色裏面，向星仔表白，片末周星馳叫莫文蔚用電鋸劈下去那場結局，更是他心聲，他說：「我係想同星仔講你劈我啦，劈落嚟大家一刀兩斷乾手淨腳，大家唔好煩。」故事尚未完結，數年後有一日接獲星仔的來電，他說：「佢話打嚟傾閒偈，講吓講吓原來套《西遊記》喺大陸唔知點解掂咗，諗住搵我傾套《功夫》，呢個鳳凰佬真係無寶不落。」
電影動人現實平淡
拍鬼片跟喜劇出身的劉鎮偉，其實暗地裏對愛情故事情有獨鍾，表面上《西遊記》及《越光寶盒》都是喜劇，但也是一部喜劇糖衣包着的愛情片，就連上一部《機器俠》亦一樣，講的是機械人方力申跟人類孫儷片刻的愛情。劉鎮偉說：「情係每個人都有嘅情感，亦都係好大發揮嘅題材。」若你覺得導演會有段可歌可泣的過去或悲壯的愛情，現實或會令你失望，適婚年齡結婚後移民加拿大再生個女，已是劉鎮偉所能說的畢生愛情故事，他笑說：「我嘅愛情故事真係乜冇嘢特別！」難道是因為所有精力都放在電影所致？
場地提供：GatewayHotel
服裝：5cmofIT
化妝：YenLa
髮型：HoraceTseofChinG.
鄭中基拒扮周星馳
這趟是鄭中基（Ronald）第二次跟劉鎮偉合作，對上一部合作的電影《機器俠》並未嚇怕他，他說：「冇影響喎，香港可能麻麻，內地反應唔錯。第一次同導演合作已經發覺可以喺佢身上學到好多嘢，今次都唔例外。」
唔怕觀眾先入為主
Ronald在戲中演山賊清一色，當中不乏惡搞周星馳的情節，星爺在《西遊記》有自己演繹的獨特方式，肯定會讓觀眾有先入為主，他說：「導演都有同我講過呢個問題，佢話當年周星馳出道，啲人就會將星仔同許冠文比，今次好自然會用我同星仔比。其實兩個人嘅表演方式好唔同，即係話每個人表達方法都唔同，點有得比？」
Ronald表示最有選擇權的是觀眾，但觀眾總不會想買一張鄭中基電影的戲票，卻想看周星馳式的表演，他說：「我唔會扮佢，你亦唔會想見到周星馳演緊鄭中基嘅戲。導演搵我係想為部戲輸入另外一啲元素。」他表示跟導演合作最開心的是當你遇到不懂演的戲份時，他可以為你預演一次，Ronald笑說：「你話唔識做，佢就會做一次畀你睇，萬試萬靈。」
故事簡介
追尋真愛 誤闖赤壁
《越光寶盒》並不是兩集《西遊記》的續篇，但故事卻來自《西遊記》中紫霞仙子的紫青寶劍和月光寶盒。玫瑰仙子（孫儷飾）因仰慕紫霞仙子（朱茵飾）與至尊寶的愛情而偷走紫青寶劍，但遭山賊清一色（鄭中基飾）設陷阱打劫，找到紫青寶劍後還打算賣掉的清一色，突遭至尊寶幫助拔出紫青寶劍，玫瑰仙子馬上認定他就是一生至愛，及後《西遊記》的菩提老祖等窮追牛魔王後使用月光寶盒，誰知去了三國，捲入了出人意表的赤壁戰場，在時空穿梭中展開一段瘋狂的愛情。《越》片惡搞《赤壁》及《鐵達尼號》等大電影，還有60多位串星演出。
