日圓仲係高企，改去平啲嘅韓國睇櫻花，而韓國觀光公社公佈咗櫻花開花期（詳見 http://big5chinese.visitkorea.or.kr/cht/index.kto）
，比以往快6日，最快3月21日已經喺最南嘅濟州西歸浦睇到，因為未到復活節旺季，唔使幾百蚊附加費！
韓國觀光社「御用」攝影師何振威話，當地櫻花唔比日本遜色，但使費平好多，而西歸浦有好多櫻花樹，企喺街頭就可以感受一場動人櫻花雨。據講秦朝徐福嚟到高麗搵仙草藥（即係靈芝）後，就係由西歸浦返中國。
何老師話，首爾汝矣島櫻花大道4月6號先開花，如果復活節假去韓國睇櫻花嘅，可以去慶州，當地普門湖畔有4公里長櫻花道。慶州馬拉松咁啱係4月3日，大家可以幫人打吓氣。
韓國朋友講，佢哋對櫻花又愛又恨，因為家嘅櫻花樹都係日本佔領韓國時種，韓國獨立後人民好憎櫻花，但後來有韓國學者發現，櫻花最初係由韓國傳過去日本，令韓國人重新愛上櫻花。講真，小妹有啲保留，因為韓國學者乜都夠膽死講，屈原、端午節都可以話係佢哋啦……。
有攝影師教影花
點都好，睇花係人算不如天算，睇唔到櫻花唔緊要，濟州、慶州都有油菜花田，鮮黃花海喺韓國觀光相片都經常出現。如果想跟何老師學影櫻花，可以去新華旅遊報佢隨團嘅濟州或慶州團，詳情可以打27222888。
電郵：mailto:[email protected]