中共同依附中共嘅物體，無所不用其極打壓公投，連煲呔都聲言未必投票，出口術向公務員施壓令佢哋唔敢投票，唔少喺中資公司做嘢嘅人，亦擔心投票後遭秋後算賬，近日六神無主心神恍惚，民主之父馬丁噚日去社民連總部演講，被問到點樣安心投票時，提出一條絕世好橋。
「驚影相咪戴口罩囉」
馬丁話投票係公民責任，理應唔使擔心，但如果真係怕有麻煩，可以考慮扮鬼扮馬，「投票冇問題喎，如果驚俾人影相，咪戴口罩囉！」佢又笑言用紙袋笠頭亦得，最新人辦係志雲大師個飲完咖啡Look，即係戴帽加埋口罩，除非你係志雲啫，否則好難被人認出真面目。
五區公投俾北京高壓打擊，馬丁見慣大風浪，話大狀打官司最開心被問尖銳問題逼到埋牆角，「好多大狀都係咁，你逼到佢埋牆，佢嗰啲最好嘅嘢先出嚟，好似打交一樣，被逼到埋牆，就要出絕招。」至於拆解北京打壓有何招數，馬丁故作神秘，一副山人自有妙計樣子，只係講咗句：「睇唔透（個局）。」
好多人指社民連係惡人黨，早前終極普選聯盟成員兼學者蔡子強深入社民連分享會，幾乎未開聲就俾人插到體無完膚，長毛噚日特別交帶黨友要客氣啲，唔好講粗口就得嘞，馬丁則笑言未入門口已獲長毛「問候」，可見社民連十分熱情。馬丁演講後，劉山青送上一個「民主萬歲」蛋糕，有80後請馬丁寫句給香港的說話，馬丁好認真咁深思一輪，揮筆寫下「冇民主，冇自由！」希望大家繼續爭取民主，爭取自由。
大鬧志雲女子撐送湯
志雲咁hit，連馬丁都好留意，不過佢肯定唔係志雲國際後援會成員，前晚有兩個聲稱係後援會成員嘅女子送湯去廉署慰問志雲，好多人疑惑志雲竟然有癡心fans，原來其中一人係網台主持愛明，佢曾喺廣管局聽證會公開鬧陳志雲，前晚名為送湯，八方覺得似贈興囉，不過佢網上留言卻話係真心欣賞志雲，希望佢大步檻過。
mailto:[email protected]