噴血忍者Rain　Making睇練筋肉人

三級片！呢套《忍者刺客》噴血噴到唔識收，鍾意睇B級片的話，買佢可以過足個半小時快感，而且阿Rain更大量親身上陣、賣力演出，掌聲鼓勵。

記者︰陸俊雄

由細打到大

唔好以為見到阿Rain先有打鬥位，其實講佢細細個開始，已經過住非人生活，做人一個宗旨，唔係你死、就係我亡！所以無論係單眼皮小朋友又好，大過少少的單眼皮花o靚仔都好，經常被人打到皮開肉裂，師傅話有疤先似樣。
既然無得揀，打低其他同門兄弟，細細個就斬到對方頭破血流。但有段戲一定要留意，係講少年Rain在一個吊滿燈油的環境下對打，場景設計頗有心思，少年演員們亦真係打得幾勁吓，絕不讓大Rain專美。

半套茄汁戲

雖然套戲內容好一般，由於故事藍本來自遊戲，打機一樣，總之最後一定打大佬，但勝在有一半時間都係打打殺殺無停手，而且一出手噴血成河。最血腥首推阿Rain第一次出勤殺肥佬，由於呢節在全白色的廁所中進行，紅血一噴，即使明知後期加工，也睇得惡心。而想試包圍感的話，一定係阿Rain在屋內練功耍兵器，以及雨中在天台跟師傅反目，一堆飛鏢逐一插向阿Rain，暴力得來又有幾分美感。最可惜反而係尾場決戰，殺師傅時竟然噴血噴得最假。

忍者有段古

今次《忍者刺客》Bouns算唔錯，因為唔只得導演訪問，更有唔少關於忍者的歷史。最好笑係有一把年紀的忍者後人話，電影見到的太傳奇唔真實，真正的忍者係講求隱藏身份，即是隨時身邊嗰個阿伯係忍者都唔定。仲有，粉絲更可睇到阿Rain歷時半年，每天訓練6小時的過程，睇住你偶像變成筋肉人。