【志雲難局之一鋪清袋】現年43歲的無綫監製錢國偉大前日因貪污案被廉署拘捕，過往在無綫工作27年，其中製作的節目《美女廚房》捧紅過不少新女，錢國偉風光期間不時風騷偕廚房妹夜蒲，曾啜爆陶喆的o靚模岑潔儀（Zoey）原來也是他的鐵膽蒲腳，錢國偉被捕前更先後與Zoey和愛將陳蕊蕊約會，如今遭無綫停職隨時冇得留低，錢國偉拖女風騷夜蒲的日子恐難再現。
無綫監製錢國偉善於炮製綜藝節目，他一手創作的《美女廚房》收視高企，該節目令不少發明星夢的少女夢寐以求，人人爭做鏡頭前扭腰晒身材的廚房妹，希望一朝彈出上位有望，造就錢國偉桃花運旺盛。近年他每逢夜蒲或看首映，身邊總有小花伴左右，不過錢國偉近日捲入廉政公署調查中的「威遠」行動，他與無綫業務總經理陳志雲、市場及營業部業務拓展主管陳永孫、藝員寧進和陳志雲私人助理叢培崑五人遭拘捕，直至前晚才陸續獲釋。
入行27年由低做起
錢國偉近年多次被指假公濟私拖女夜蒲，去年更被廚房妹之一的「豆沙包」梁懿晴數臭迫出席飯局，由於風流賬一大籮，甚至有指關於錢國偉的告密信直抵陳志雲手中，但礙於陳志雲一直力保他，每次都倖免於難。可是這次他與陳志雲捲入貪污醜聞，自83年開始在無綫任職辦公室助理起步的錢國偉，至今擢升至綜藝節目監製，工作27年的成果將會一鋪清袋。錢國偉被捕後，他更即時遭停職，無綫立即安排另一位監製衛世輝接手原本由錢國偉監製的節目《飲食天王頒獎禮》。
平時偕女在夜店爛蒲醉飲狂歡的錢國偉甚為風騷，就算遇上狗仔隊都任影唔嬲，對鏡頭毫不避忌。可是錢國偉前晚10時獲准保釋外出後卻避見傳媒，他為擺脫記者追訪，竟當所乘的七人車駛至銅鑼灣一個交通燈位停下時，他落荒的下車奔入港鐵站，行為狼狽又鬼祟，與之前拖女夜蒲的威風判若兩人。
Zoey：佢帶我入行
向來艷福無邊的錢國偉攬女照數之不盡，記者昨午在去年啜爆陶喆而為人認識的o靚模岑潔儀（Zoey）的facebook內，也發現她有不少與錢國偉的親密照，除了有錢國偉跟她的頭貼頭自拍大特寫，還有二人跟落選港姐黃瑩並排夜蒲照，以及Zoey去年出席寧進生日派對的照片。被捕的陳志雲私人助理叢培崑旗下的「思潮」製作公司，去年8月曾為陶喆在澳門搞演唱會，看來錢國偉、叢培崑、陶喆和Zoey的關係千絲萬縷，糾纏不清。
記者致電Zoey，她直言很擔心錢國偉，她說：「事發前幾日我喺九龍灣做嘢，Wilson（錢國偉）話啱啱做完BIGFOUR綵排，當時仲趕過嚟後台探我，我哋又傾咗一陣，所以佢被捕，我真係好愕然。」Zoey不諱言是錢國偉的蒲腳，彼此不時夜會，她說：「佢都算帶我入行，我都識寧進同阿雪（孫慧雪）。」
豆沙包：冇興趣留意
有見錢國偉和寧進落難，人人劃清界線，Zoey卻力撐：「呢個時候無論點，我都會支持佢哋，有難嘅時候係最需要朋友，希望佢哋冇事。」Zoey表示不擔心將來錢國偉在無綫冇得撈後受牽連，她說：「我唔擔心冇job。」談到寧進為人，Zoey說：「佢份人儍更更，好可愛。」未知可是要護友到底，Zoey接受訪問後馬上把facebook的照片鏟走。
錢國偉前晚獲保釋外出，他的o靚模愛將「桔」陳蕊蕊有傳是叢培崑擁有的模特兒公司旗下藝人，陳蕊蕊昨日否認：「我唔係嗰間公司嘅。」她也出言維護錢國偉說：「我哋前幾日先一齊做完嘢，佢之後仲同我食飯，多數都係佢請。」不過錢國偉棄將「豆沙包」梁懿晴昨日卻不屑說：「我冇興趣留意。」
採訪：李全
話你知：迷雲黨前途堪虞
從前陳志雲權傾朝野，身邊猛男愛將全部福星高照，監製錢國偉遇事每每能逢凶化吉，如今陳總落難，錢國偉率先陣亡，其他愛將也命運迴異。
愛將：崔建邦
簡介：因涉毆打前女友鄺敏慧閉關近個多月，工作全面停頓，且官司未了，案件排期至5月18日開審。
愛將：鄧健泓
簡介：「honey」出事，鄧健泓聲稱工作一切如常，5月更會推出唱片。
愛將：張繼聰
簡介：「其妻謝安琪因亮相有線，連帶自己亦遭無綫封殺，《正識第一》及《超級巨聲》主持之位被擯出局，目前未接獲無綫委派新工作。
愛將：馬浚偉
簡介：早前傍實陳志雲出席慈善活動的馬浚偉，因剛與無綫續約，影響應該不大，現仍有主持節目《大廚出馬》。
愛將：王喜
簡介：早年與樂易玲展開罵戰，全靠加入迷雲黨而逃出生天的王喜，如今陳總失勢，相信他也會成為炮灰。
愛將：陳鍵鋒
簡介：早前與楊思琦合演的《翻叮一族》仍未播出，他下月將夥拍謝天華和馬德鐘拍攝古裝劇《洪武三十二》。
資料來源：《蘋果》資料室
小八卦：除罩論當堂失效
「有信心咪除（口罩），唔使閃避，堂堂正正行入去。」陳志雲日前以前輩兼好友身份，向正涉嫌毆打前度女友的崔建邦訓示，着他上庭應訊時毋須戴口罩，要堂堂正正做個真男兒。想不到時隔不足一個月，此話反令陳志雲陷入尷尬場面。他因涉嫌貪污被廉署通宵扣查39小時，離開時煞有介事的戴上口罩及鴨舌帽，雖然未知他是否對調查信心不足，但肯定他對自己遭扣查後沒法剃鬚set頭扮靚耿耿於懷。
