星光集團（403）高息、低PE，兼備內銷及市場復蘇元素，冷灶值得煲。
星光主打印刷及包裝，係冷門工業股，但集團93年上市到家陣，挨近17個年頭，見慣幾多個金融風暴，已經係信心保證。星光2010年半年度，受海嘯後遺症影響，純利跌兩成到3170萬銀，但Keep住派中期息1仙，回饋股東。隨住下半年環球經濟走出谷底，星光肯定可以受惠。加埋集團擴大內銷業務，食住龐大內需，嚟緊日子，可以好肥仔。
好保守計數，星光2010年度純利只係維持喺09年度5970萬銀，全年派息2.5仙，PE都係得5倍，而息率就高企4厘。隨住內銷效應反映，2011年度純利係咁意增長30%，PE得番3倍幾。冷吼星光，博現價0.57元翻半番到0.85元，預期PE仲低企7倍水位。
丹楓短炒博升22%
安寧控股（128）上星期五單日升14.4%，創咗8年新高，追買丹楓控股（271）。市場裏面，小甜甜（龔如心，已故）有股權嘅，除咗安寧，仲包括丹楓（23.09%）。安寧勁升，丹楓有少少同氣連枝因素。就算唔炒呢個Point，丹楓透過聯營揸住唔少紅山半島優質物業，豪宅市場火熱，丹楓都重估有價。短打博丹楓創1年高位，上返1蚊，潛在回報率22%，NAV折讓仲高企44%。
錢雋