終審法院首席法官李國能同利豐集團主席馮國經，噚晚分別獲美國伍德羅威爾遜國際學者中心（WoodrowWilsonCenter）頒發公眾事業獎及企業公民獎，頒獎嘉賓本來係美國前國務卿基辛格，可惜佢出訪時喺南韓病倒，唔能夠嚟香港，改由美國前駐華大使芮孝儉頒獎。
當年基辛格曾詐病秘密到中國，促成中美建交，莫非今次重施故技，去北韓做密使？芮孝儉稱致電基辛格，證實佢身在南韓，不在平壤。
伍德羅威爾遜國際學者中心為紀念美國第28屆總統伍德羅威爾遜（WoodrowWilson）而成立，今次係首度有港人獲得殊榮。李官獲獎，係表揚佢對香港司法獨立作出重大貢獻，佢致辭時重申，香港在一國兩制下，司法獨立非常重要，而馮國經則獲讚揚係熱心公益嘅商業大亨。