【志雲難局之天無絕路】無綫總經理陳志雲涉貪污被捕前程未卜，因常扮陳總而跟他傳不和的詹瑞文昨日為新戲宣傳，戲中再度扮陳志雲的他不忘讚陳志雲有能力，不難另謀出路。而一向牙尖嘴利的蘇施黃則叫陳總看聖經度難關。
詹瑞文以往經常扮陳志雲演出棟篤笑，由於當中有醜化成份，故有傳激嬲陳志雲令兩人不和，故一直以來無綫節目絕少訪問詹瑞文。昨日詹瑞文和吳君如為新戲《美麗密令》在中環宣傳，問到陳志雲因涉貪污被捕，詹瑞文強調私下和對方未有交惡，他更叮囑對方不要害怕及擔心。
問到陳總是否似貪污的人？詹瑞文說：「人人心內嘅嘢冇人知，我就冇參與過有關公司嘅演出。」當年傳因詹瑞文得罪陳總，結果無緣為無綫做節目，詹瑞文重申：「之前無綫係曾經搵我做兒童節目，但自從我做完舞台劇《萬千師奶賀台慶》之後就冇咗下文，如果件事係真梗係唔係咁好。」
50歲仲係壯年
詹瑞文在《美》片中扮演的「岑總」外形似足陳志雲，故最近的新聞不免成為宣傳，詹瑞文聞言說：「一句講晒，天意啦。」陳志雲未來恐怕不能再在無綫立足，詹瑞文直言：「其實電視係夕陽工業，陳生有能力，50歲仲係壯年，好多嘢可以發揮，可以做第二樣嘢。」現場有無綫娛樂新聞台採訪隊，主持袁嘉敏更有訪問詹瑞文，但事後無綫外事部副總監曾醒明解釋說：「其實佢哋係主要去訪問君如，可能個新同事唔識應付現場場面，新聞台有編採自主，我所知詹瑞文個訪問唔會播出。」
同場的君如表示當日參加《志雲飯局》舞台版演出，因慈善性質未有收酬勞，但有車馬費，問到有否曾接工作但未有收錢？君如笑說：「冇喎，唔敢啦，叫我唔郁，因為我係無價。」提到詹瑞文指陳志雲新聞可為新戲宣傳，她笑說：「套戲愚人節上，希望佢大步檻過，冇事。」
阿蘇卧病感受深
另外，蘇施黃昨日在MegaBox宣傳新書，談到陳志雲，阿蘇以自己患病卧床三個月時受感動的聖經金句轉贈陳志雲，阿蘇引述《詩篇》第25章第12節，內容指「誰敬畏耶和華、耶和華必指示他當選擇的道路。」她表示自己並不認識陳志雲，問到可試過被人壓價，她說：「我喺78年出道，我係按番自己年代嘅做法做嘢。」此外，Facebook有人成立「反對阿So侵略澳門各大食店」群組，指阿蘇公佈好食肆，生意旺卻拖累食肆質素下降，她表示大家要學識分享。
採訪、攝影：溫敏之、梁錦雯
全城熱話
涉貪污一度被廉署扣查的陳志雲及錢國偉等，一切在無綫的工作及職務必須暫停，至於有傳藝人歌星接job被壓價，各人亦意見不一。
鄧梓峰：我哋海鮮價
我有試過同呢間公司合作，係幾個月前，做一個私人公司嘅聯歡派對。當時傾都係一間普通製作公司去傾，後來聽同事講先知。當時係Edthancy（叢培崑）搵我，我唔知佢係陳生助手。傾價錢嘅時候，我一開價都OK，佢冇還價。其實唔可以話壓價，我哋價錢好海鮮價，呢啲你情我願，我聽到呢件事震驚到癲。
張敬軒：買嘢都會講價
大家去買嘢都會講價叫平啲，至於話做無綫騷只有一百至幾百蚊酬勞，咁又冇咁少，作為歌手有好多時出席活動唔計較收錢，係想有宣傳，有時做電台例如拉闊咁都無實際酬勞，不過接冠名活動就會問價錢同收足。
無綫監製何小慧：會跟足程序
我未係接手錢國偉個節目，要等公司安排。站在同事立場梗希望佢冇事，雖然我唔知詳情，但都有唔開心。有冇試過有利益引誘？我唔知點答，但公司係有指引，我每次做嘢跟足程序搵贊助同歌手，成team人會一齊開會傾。
鄭中基：安慰錢國偉
我未打畀錢國偉，都替佢擔心o架，咪傳咗短訊畀佢，佢冇覆我呀，都唔使覆啦，我叫佢休息吓，唔好諗咁多。如果廉署叫我協助調查？冇所謂呀。我冇遇過壓價情況喎，都冇同叢培崑公司合作，台慶我都幾年冇去啦。
莊思敏：唔使畀面人
我有接過呢間公司嘅工作，當時係做模特兒同司儀工作，我哋合作係公平，冇壓價同異樣，我唔信佢會咁做。其實呢行冇特定價錢，唔想做可以唔接，唔使畀面任何人，我都試過因為市道唔好，出去做嘢叫收平，啲人話因權壓價真係諗多咗。
江若琳：利是當酬勞
我冇接過呢間公司嘅工作，嗰陣我做完澳門嘅台慶騷，唔知收咗幾多錢，係公司幫我收，我淨係知道有人話有利是，我覺得呢啲係做歌手嘅本份，就算冇酬勞都冇所謂。
林燕妮：志雲唔打招呼
我唔識陳志雲，但喺歡樂今宵2000次搞咗大派對，佢坐我隔籬，畀我印象冇招呼人，食兩碟菜就走。我見過佢一次，所以對佢評價唔太全面，會有偏見，佢唔打招呼囉。