馬會上個月忽然推出「足智即場睇」新服務，千幾個特選客戶可以網上免費睇波，正當好多人期待呢種新服務會否擴大之際，原來馬會已低調「停賽」，話接獲服務供應商知會，由於部份技術未達到令客戶滿意水平，所以要無限期押後推出呢項服務。
消息話，由於關注賭風團體對馬會呢種新服務好有意見，馬會內部亦有唔同睇法及好大壓力，所以匆匆叫停；而博彩及獎券事務委員會星期二開會，有議程討論呢單嘢，委員會邀請馬會代表出席解畫，為免做箭靶，避一避風頭係明智之舉。
團體施壓避風頭
八方聽聞有博彩及獎券事務委員已經發難，要求民政局交代馬會網上直播球賽是否啱規定，有冇牴觸發牌條件，據知局方認為冇問題，不過官府開綠燈唔代表一帆風順，馬會仲要睇吓民意先定奪下一步行動。
博彩會成員、明光社副主席陳一華牧師指馬會推出新服務擺明係「試水溫」，為將來網上播波鋪路，如果唔及早督促，更多人沉淪賭海，恐怕為時已晚。