九龍灣草場噚日上演車仔大戰街坊好戲，唔係正牌車仔，而係車路士足球訓練學校（香港）隊對油麻地街坊會小學，結果車仔勁炒街坊會9比1。
呢場比賽由樂施會與香港公平貿易聯盟主辦，目的係推廣「公平貿易」及種族共融，油麻地街坊會小學有唔少南亞裔學生，所以邀請佢哋出賽，今次有祖籍巴基斯坦小球員落場。呢啲友誼波勝負其次，開心第一，主角其實係個波。原來全球近八成足球都係巴基斯坦工廠出產，多數請廉價童工做縫製足球工作，好多時童工薪酬、工傷都冇保障，可以話係血汗足球，噚日踢個波由巴基斯坦公平貿易工廠出品，保證唔係請童工做，工人有最低工資、醫療保障，做嘅開心，踢嘅高興。