亞視股東嗌交搶咗幾日頭版，TVB一出新聞就驚爆全香港，呢兩日相信無人不講無綫陳總被捕呢單嘢，大台果然係大台，輕易就搶番風頭，ATV應該服輸。
陳志雲被扣查期間，相信冇啖好食，不過佢食長齋，戒兩日口冇所謂啦，大家近年見志雲出鏡好瀟湘，實情係刻苦減肥才修成正果，其身形同權位成反比，回到未紅時係肥仔一名，近年一人之下，卻越來越苗條。
據陳總自述，佢出世時係個11磅9安士重巨B，年齡與體重同步成長，讀中學時要睇醫生食藥減肥。每個肥人減磅都有罄竹難書血淚史，陳志雲都唔例外，當年佢食藥後體重下降，不過心跳卻加快，兼有口乾、失眠等副作用，停藥後又增磅，就在肥完瘦，瘦完肥嘅無間地獄中度過青春期。
後來體重如脫韁野馬，92年踏上高峯達220磅！佢話自己唔覺，朋友見到反而嚇一跳，紛紛勸佢keep好啲，佢終於頓悟決心減肥，先由飲食入手，只食高纖低脂食物，加埋狂做運動，兩年內減60磅。
TVB鏟blog惹爭論
瘦身後陳志雲事業一帆風順，喺電視城呼風喚雨，可以想像有唔少對頭人，不過正所謂曹操都有知心友，志雲大師又豈會無fans？前日陳總被ICAC招呼去飲咖啡，TVB.COM隨即刪除佢個blog，有人似乎覺得TVB唔使做到咁絕，喺TVB.COM留言板上發起網投，畀機會網民表態。
呢個網投暫時只有幾十人投票，未必具代表性，不過結果幾有趣，有逾半投票網民認為TVB趕絕陳志雲「不對」或「很不對」，事關陳志雲冇功都有勞，TVB唔應該咁對佢；亦有人認為咁做違反冇罪推論原則，TVB咁大動作，無疑假設陳總已經有罪，對佢好唔公平。
支持TVB嘅人認為，既然ICAC查到上門，TVB唔應該俾有貪污嫌疑嘅人個Blog留低，加上TVB係大台，維護公眾形象無可厚非，咁做有乜問題？
mailto:[email protected]
