有亞洲第一中鋒之稱嘅尹志強（尹佬）已經離開我哋差唔多一個月，不過好多忠實球迷依然記得佢當年喺球場嘅英姿，前晚一班資深球員喺灣仔修頓球場搞咗一場尹志強嘅紀念足球賽，吸引咗唔少球迷嚟捧場。
尹佬女友米雪同尹佬嘅爸爸、細佬都有現身，其中尹佬細佬更着咗件10號球衣落場踢埋一份，實行身體力行向哥哥致敬。
墨鏡掩憔悴
至於米雪就以一身深色衣服同埋戴上黑超出現，雖然尹佬已經走咗成個月，但係米雪依然有啲面容憔悴。當球賽開始時，米雪同尹父及尹佬細佬一齊接受紀念品同影相留念，開賽前現場一眾球迷先同球員鼓掌一分鐘向尹佬致敬，之後就進行比賽。米雪話呢場紀念賽係一班尹佬生前嘅波友發起，佢哋同尹佬都識咗好多年，感情好深厚，難得佢哋咁有心，米雪話好開心。
唔講陳志雲
另外米雪透露咗尹佬追悼會嘅初步安排，佢話：「追悼會會喺呢個月27號喺青衣足球場舉行，由於係明星足球隊搞，所以詳情我都唔係好清楚。」至於講到無綫總經理陳志雲涉貪污被捕，米雪就不肯多講。