當意大利鹹濕總理貝盧斯科尼禮拜三喺記者會上向記者爆粗，仲趕埋人出會場嘅同時，佢嘅AC米蘭亦喺歐聯俾人「趕出場」。
查實踢完首回合，AC躉已打定輸數，焗攻大敗冇難堪。直到呢場至覺得AC後防有問題嘅人，先至有問題。
好彩我由季前一路話愛隊未掂（就算最後有望染指意甲，都只因國米甩轆，唔代表AC勁），態度貫徹，否則又被戰友牽牛話我口不對心。當下AC呢條防線係我所見過最脆弱嘅，亦係令靚佬李安納度長期頭痕嘅事。明日3‧14唔只係香港打吡賽馬、白色情人節，希望亦係迎擊基爾禾嘅AC振作之日。
主觀願望講完，本周信心最大係熱拿亞主場贏卡利亞里，前者越睇越似起飛緊，後者越睇越似下沉緊。
藍鑽石
主客和：熱拿亞勝
心得：「熱」得有理
近5場往績：WWWWL