拍過裸露的《AV》冇事（被列IIB級）、粗口橫飛的《出埃及記》過骨（也是IIB級），想不到一部食煙加粗口的《志明與春嬌》出事，彭浩翔因而變身III級片導演。對於這個「成就」，令他對電檢制度無所適從，他怒轟：「原來香港電檢可以咁冇準則！」身份升級，夢想也一樣升呢，由當初講過希望到杜老誌夜總會開會傾劇本這個卑微願望，搖身一變到今時今日想坐老闆的私人飛機、遊艇去影展，認真與時並進。
撰文：何永寧
彭浩翔憑一部毫無色情、血腥欠奉，只賣粗口的電影《志明與春嬌》晉身III級導演行列而感到自豪，他日前接受本報記者專訪說：「以一部浪漫愛情故事做到咁嘅效果，可能都算係一種成就。粗口其實好普通，唔好講創作人，你同朋友食飯聚會都會講。粗口係一種語言文化，每一個階層唔係一定鬧人都會加粗口做一種助語詞，你唔好睇到咁洪水猛獸，所以今次因為粗口而III級會覺得有啲唔明。」
新戲開心爆粗列III級
不只彭浩翔覺得奇怪，連他的父母知道後都忍不住問個究竟，彭浩翔說：「老竇老母都打嚟問『阿仔點解呀』，我就話『阿爸阿媽我都唔知呀』。」彭浩翔表示今趟《志明與春嬌》一片中的粗口只是適量，只比起前作《出埃及記》稍多，令他對電檢制度無所適從。他半帶自嘲地笑說：「其實我都問過佢點解兩部片差唔多，點解可以一部III級一部IIB級（青少年及兒童不宜）。電檢嗰邊都好誠懇同我講，因為張家輝喺《出埃及記》裏面講『×你呀』係好嬲、好大壓力之下講，係感情發洩。《志明與春嬌》裏面嘅余文樂係喺好開心嘅情形下講『×你呀』，兩句粗口語氣好唔同，所以《志明》要III級。早講呀！係咁我叫啲演員就算嗰場戲好開心，都要用好嬲嘅語氣去講『×你呀』，原來咁就過到電檢，真係『×你呀』咁就過到骨。原來香港電檢可以係咁主觀、咁冇準則。」
彭浩翔笑言在這方面內地的電檢制度似乎比香港還要先進，他說：「呢樣要讚吓內地，佢哋唔批你（部戲）都會話畀你聽死因，你乜乜乜唔得，剪咗佢就得，再叻啲嘅直情教埋你點拍。香港就淨係話你知『喂，唔得喎』，咁你就要自己去估，部戲咁長點估？」
要讓《志》片III級變IIB級其實亦有可能，但不可行，彭浩翔說：「真係要IIB級上嘅話，就惟有將啲粗口改成『嘟』，余文樂同楊千嬅講嘅對白有可能變成『嘟你嘟嘟嘟，你一腳踏兩船呀』，點嘟到咁多呀。」其實雙重標準一直存在香港的電影檢查制度，外語片如何粗口橫飛，一般都是II級，這點亦令彭浩翔非常感慨，他說：「荷李活套《無間道風雲》（TheDeparted）粗口勁啦，你又唔見III級？總之香港片有廣東話『門』字部嗰五個字就實三級，可能電檢班人覺得中文啲人易明，英文唔係咁多人識聽，又或者廣東粗口太到肉，貼身同情慾會影響下一代。咁你不如叫18歲以下青少年唔好去旺角仲實際，一街都係粗口。」
解構禁煙後社會現象
嘮叨發過後，電影還是要發行，彭浩翔希望因為III級愛情片在港不算太多，會吸引到一班18歲以上青年入場，他樂觀地說：「可能咁反而會有啲後生仔好奇點解楊千嬅同余文樂冇搞嘢會列III級嘅，所以入場睇吓。」
《志》片的構思是想透過因為禁煙條例實施，引發各人走向街頭吸煙的社會現象，彭浩翔說：「我有次返工時間去探一個朋友，見佢同成幢商業大廈唔同層數嘅女仔都會打招呼，佢話『食煙識嘅』。嗰一刻我好氣憤之餘仲好羨慕佢，因為我唔食煙，冇呢個機會，估唔到一條法例會開拓咗一個畀人溝通嘅機會，直情係另類clubbing。我做資料搜集仲見過有巴基斯坦人同香港人圍住一齊傾偈食煙，直情偉大到可以打破民族隔膜。我當然冇咁偉大，我只係好簡單寫一個因為圍爐食煙而產生愛情嘅故事。個名係用樂隊五月天一首同名歌《志明與春嬌》，冇原因，純粹鍾意首歌。」
盼坐私人飛機赴影展
彭浩翔希望可以安排電影參加影展，原因跟拍他的電影一樣另類，他開玩笑說：「之前因為遲入行，所以錯過咗喺杜老誌傾劇本咁美好嘅時光，今次目標係想坐吓老闆（林建岳）架私人飛機。因為佢哋話幫林生拍戲去到影展，林生會用佢架私人飛機載你去，真係好想坐吓，同埋佢哋又話每次林生去影展都會包架遊艇當酒店住大宴親朋，我都好想出席吓呢啲盛會，希望有機會啦！」
千嬅、阿樂聞煙色變
楊千嬅自電影《餃子三更2之一》已榮升III級女星行列，一件污兩件穢無大不了，反而余文樂今趟憑《志明與春嬌》中的粗口「升呢」。兩人日前接受本報記者專訪，阿樂表示當初接拍《志》片已預了有這結果，他說：「有廣東話粗口點會唔係III級，你估西片點講都得咩。可能廣東粗口太多元化同深入，班電檢接受唔到。作為演員唔可以諗咁多，做好導演要求就得。」
「掂都唔敢掂」
不過每日不停吸煙，令阿樂這位煙民見到煙也怕，他說：「一日要食成條煙，搞到我唔使埋位，掂都唔敢掂支煙，真係拍打戲都冇咁辛苦。」
再度成為III級女星的千嬅雖然不及樂仔辛苦，但也不好過，她說：「我一日都要食一包，我本身唔食煙，你話係咪想死。」不過她自言今趟是個很好的體驗，因為開工前導演特別安排她跟阿樂與舞台劇演員排戲，千嬅說：「導演開工前一星期，將幾場重要嘅戲同班舞台劇演員一齊排，所以到正式拍攝時變得好流暢，而且大家熟咗之後交流都好咗。」
彭浩翔還用了新的拍攝器材，千嬅說：「導演話呢種拍法叫Red，有別於用菲林，係直接錄落硬碟，變相我哋可以不停試，因為冇咗要用菲林嘅負擔。導演話呢種方式拍攝喺外國越嚟越流行，而且出嚟嘅效果好接近拍片。」不過千嬅笑言正因為如此，變相令她和阿樂要吸很多支煙。
撰文：何永寧化妝：LingChanofZINGtheMakeupSchool（千嬅）、JennyTziong（余文樂）
髮型：VicKwanofHairCulture（千嬅）、BenYeungofHairCorner（余文樂）
服裝提供：I.T（千嬅）
場地提供：NathanHotelTheBali
《志明與春嬌》簡介：後巷煲煙捲三角戀
香港實施室內全面禁煙，煙民被迫從辦公室走到街上抽煙，自此造就不同背景職業的煙民，在後巷開闢了一個打諢聊天、結交朋友的特殊場所。有次，張志明（余文樂飾）主動上前為經常碰面的余春嬌（楊千嬅飾）點煙，兩人自此無所不談，一次逃避控煙辦追捕時，更初次牽手有肌膚接觸（右圖）。
當愛情開始萌芽，志明卻發現春嬌原來早有男友家豪（黃德斌飾）。另一方面，春嬌與家豪的感情也因志明的出現，泛起了暗湧。一段錯摸不定、曖昧難測的戀愛關係，由燃點香煙的瞬間中展開。
《志明與春嬌》上映日期：3月25日
